Azərbaycan, Bakı, 2 dekabr /Trend, müxbir Ü.İsmayılova/
Azərbaycanın daşınmaz əmlak bazarının fəallaşmasının bərpası 2011-ci ilin ikinci yarısından etibarən gözlənilir. Bu barədə cümə axşamı "MBA Group" konsaltinq şirkətinin baş direktoru Nüsrət İbrahimov deyib.
"Bu dövrdə bazarda hazırda çox aşağı səviyyədə olan investisiya qoyuluşlarının bərpası prosesi də gözlənilir", - İbrahimov qeyd edib.
Onun sözlərinə görə, bu gün ölkənin daşınmaz əmlak bazarının vəziyyəti böhran dövründən sonra sabitləşən kimi qiymətləndirilir.
"Mənzil bazarında qiymətlər ilin əvvəlindən bu günə qədər demək olar ki, yeddi faiz azalıb. Bu göstərici keçən il 13 faiz olub. Bu, bazarın tədricən sabitləşməsindən xəbər verir", - İbrahimov qeyd edib.
"Oktyabrda Azərbaycanın daşınmaz əmlak bazarında qiymətlər 0,9 faiz artıb, ilin əvvəlindən qiymətlər 6 faiz, il ərzində isə 6,6 faiz azalıb", - bir müddət əvvəl İbrahimov deyib.
Ekspertlərin hesablamalarına görə, oktyabrda ilkin mənzil bazarında qiymətlər 0,8 faiz - sentyabrda bir kvadratmetr üçn 783 dollardan 777 dollaradək azalıb. Qiymətlər ilin əvvəlindən 7,2 faiz, ötən ilin analoji dövrü ilə müqayisədə isə 12,7 faiz azalıb.
Oktyabr ayı ərzində təkrar mənzil bazarında qiymətlər 1,6 faiz - bir kvadratmetr üçün 1285 dollardan 1305 dollaradək artıb. İlin əvvəlinə nisbətdə təkrar mənzilin qiyməti 4,9 faiz, keçən ilin analoji dövrünə nisbətdə isə 5,4 faiz azalıb.
Oktyabrda ticarət obyektləri bazarında qiymətlər 1,6 faiz, - bir kvadratmetr üçün 3210 dollardan 3261 dollaradək artıb. İlin əvvəlinə nisbətdə qiymətlər 3,8 faiz, ötən ilin analoji dövrünə nisbətdə isə 6,7 faiz azalıb.
Keçən ay Bakının torpaq bazarı 2,4 faiz - bir sot üçün 16 310 dollardan 16 700 dollaradək bahalaşıb. İlin əvvəlinə nisbətdə qiymətlər 3,9 faiz, keçən ilin analoji dövrünə nisbətdə isə 6,1 faiz azalıb.
Oktyabrda tikinti materiallarının qiymət indeksi 1,2 faiz - 395,1 bənddən 400 bəndədək, ilin əvvəlindən 6,2 faiz, ötən ilin analoji dövrünə nisbətdə 8 faiz artıb.
Mənzil kirayəsi 2,9 faiz - orta hesabla 691 dollardan 670 dollaradək bahalaşıb. İlin əvvəlinə nisbətdə bahalaşma 10,9 faiz, keçən ilin analoji dövrü ilə müqayisədə isə 14,4 faiz təşkil edib.
Qeyri-yaşayış obyektlərinin icarəsi ay ərzində 1,2 faiz - 2486 dollardan 2517 dollaradək bahalaşıb. İlin əvvəlindən qiymətlər 13,5 faiz, il ərzində isə 5,8 faiz azalıb.
