Azərbaycan, Bakı, 6 dekyabr /Trend/
Yaxın vaxtlarda Sumqayıt şəhərində yaradılan texnoloji park layihəsi çərçivəsində iki zavod istismara veriləcək. Bu barədə bazar ertəsi Azərbaycan İqtisadi İnkişaf Nazirliyinin məlumatında deyilir.
Məlumata görə, bu gün texnoparkda 6 zavod fəaliyyət göstərir. Yaxın vaxtlarda daha 2 zavodun - Sinkləmə və Dəqiq emal mərkəzləri zavodlarının istifadəyə verilməsi nəzərdə tutulur. 8 zavodun inşası isə davam edir. 16 zavoddan ibarət olacaq bu parkda müxtəlif çeşidli məhsulların - kabellər, transformatorlar, yüksək gərginlikli avadanlıqlar, hidroturbinlər, su nasosları, elektrik mühərrikləri, borular və s. istehsalı genişləndiriləcək. Hazırda müəssisədə 800-ə qədər işçi çalışır. Məlumatda deyilir ki, bütün zavodlar fəaliyyətə başladıqdan sonra isə iş yerlərinin sayı 2500-ə çatdırılacaq.
Sumqayıt texnoparkının yaradılması haqqında qərar Azərbaycanda sənaye sahəsində iri infrastruktur layihələrin həyata keçirilməsi çərçivəsində qəbul olunub.
Məlumata görə, Azərbaycanın iqtisadi inkişaf naziri Şahin Mustafayev dekabrın 3-dən 5-dək Bakıda Özbəkistan milli sərgisində iştirak etmək məqsədilə ölkəmizdə səfərdə olan Özbəkistanın Baş nazirinin müavini, xarici iqtisadi əlaqələr, investisiya və ticarət naziri Eliyor Qəniyevi texnoparkın fəaliyyəti ilə tanış edib.