Azərbaycan, Bakı, 14 dekabr /Trend, müxbir N.İsmayılova/
2010-cu ilin yanvar-noyabr aylarında Azərbaycanda bütün maliyyə mənbələrindən iqtisadiyyatın və sosial sahələrin inkişafına 7704,5 milyon manat sərmayə qoyulub ki, bu da ötən ilin analoji dövr göstəricisini 15,2 faiz ötür. Bu barədə çərşənbə axşamı Dövlət Statistika Komitəsindən məlumat verilib.
Təmir-tikinti işlərinə qoyulan investisiyaların həcmi 5073,7 milyon manat təşkil edib ki, bu da tikinti sahəsinə qoyulan investisiyaların ümumi həcminin 65,9 faizini təşkil edib. İstehsalat yönümlü tikinti obyektlərinə 3916,8 milyon manat, qeyri-istehsal sahəsindəki obyektlərə isə 3787,7 milyon manat yönəldilib.
Ötən ilin analoji dövrü ilə müqayisədə 38 faiz artan xarici investisiyalar 1834,8 milyon manat təşkil edib. Onların xüsusi çəkisinin ümumi həcmi 23,8 faiz olub. Müvafiq olaraq investisiyaların ümumi həcmindən 76,2 faiz daxili investisiyaların payına düşür. Daxili investisiyaların böyük hissəsi (72,3 faiz) dövlət müəssisələrinə və təşkilatlara, yalnız 27,7 faizi özəl müəssisələrə qoyulub.
Əsas kapitala qoyulan vəsaitlərin 67,9 faizi (5231milyon manat) ölkədə qeyri-neft sektorunun inkişafına, 12,3 faizi (949,5 milyon manat) qeyri-neft sənayesinə, 32,1 faiz (2473,5 milyon manat) neft sektorunun inkişafına yönəldilib.
İnvestisiyaların 44,4 faizi sənaye sahəsi, 4,8 faizi kənd təsərrüfatı və balıqçılığın, 2,8 faizi ticarət, 22,2 faizi nəqliyyat, 1,5 faizi rabitə, 1,7 faizi səhiyyə, 1,3 faizi təhsil, 10,5 faizi daşınmaz əmlak üzrə əməliyyatların (onların 10,3 faizi mənzil təsərrüfatının payına düşür), 1,6 faizi tikinti, 2,7 faizi istirahət, əyləncə və incəsənətin, 2,9 faizi dövlət idarəçiliyi, 0,1 faizi maliyyə və sığorta fəaliyyəti, 2,2 faizi mənizilin təşkilinin, 0,6 faizi inzibati və yardımçı xidmətlərin, 0,5 faiz isə digər sahələrin payına düşür.
Maliyyələşdirilməsi dövlət hesabına həyata keçirilən obyektlərin tikintisinə 2010-cu il üçün nəzərdə tutulan 3549 milyon manatdan 2285,4 milyon manat investisiya yatırılıb.
Müəssisə və təşkilatların vəsaitləri hesabına əsas kapitala 4089,6 milyon manat (investisiyaların ümumi həcmindən 53,1 faiz), bank kreditlərindən 366 milyon manat (4,8 faiz), büdcə vəsaitlərindən 2444,8 milyon manat (31,7 faiz), büdcədənkənar fondların vəsaitlərindən 469,6 milyon manat (6,1 faiz), əhalinin şəxsi vəsaitlərindən 323,3 milyon manat (4,2 faiz), digər vəsaitlərdən isə 11,2 milyon manat (0,1 faiz) sərmayə qoyulub.
Dekabrın 14-nə olan rəsmi məzənnə 0,7987 AZN/USD təşkil edir.