Azərbaycan, Bakı, 16 dekabr /Trend, müxbir N.İsmayılova/
İsveçrənin İnkişaf və Əməkdaşlıq Agentliyi (SDC) Azərbaycanın Ağcabədi və Beyləqan rayonlarında heyvandarlıq sektorunun inkişafına dəstək verəcək. Bu barədə Trend-ə cümə axşamı SDC-nin regional direktorunun müavini Filip Keller deyib.
"Artıq iki aydan çoxdur ki, bazarın qiymətləndirilməsi aparılır, gələn ilin fevralında isə bu sahədə gələcək fəaliyyətin müəyyən edilməsi məqsədilə layihənin müzakirəsi keçiriləcək", - Keller qeyd edib.
Onun sözlərinə görə, layihənin birinci mərhələsi üç il ərzində həyata keçiriləcək və onun uğur qazanacağı təqdirdə, 2-3 il müddətinə ikinci mərhələnin həyata keçirilməsinə təşəbbüs göstəriləcək.
"İlkin hesablamalara görə, layihənin dəyəri iki milyon dollar təşkil edir", - o əlavə edib.
Kellerin sözlərinə görə, layihənin həyata keçirilməsinə 2011-ci ilin mayında başlanacaq və əsas məqsəd kiçik fermerlərin öz məhsullarını satması üçün bazardan istifadənin sadələşdirilməsi olacaq.