Azərbaycan, Bakı, 18 dekabr /Trend, müxbir N.İsmayılova/
Azərbaycanda "KfW" Almaniya İnkişaf Bankı və İsveçrənin İqtisadi Məsələlər üzrə Dövlət Katibliyi (SECO) ilə birlikdə həyata keçirilən Gəncə və Şəki şəhərlərində su təchizatı və kanalizasiya sisteminin bərpası layihəsinin birinci mərhələsi çərçivəsində tikinti işlərinə başlanılıb. Bu barədə Trend-ə SECO-nun Azərbaycandakı nümayəndəsi Filipp Keller deyib.
"Layihənin rəsmi işə salınması və tikintinin başlanılması keçən həftə Şəkidə həyata keçirilib", - Keller qeyd edib.
Onun sözlərinə görə, layihə SECO-nun Azərbaycanda maliyyələşdirdiyi iki infrastruktur layihəsindən biridir və gələcəkdə Dövlət Katibliyi Azərbaycanda oxşar layihələrin maliyyələşdirilməsində iştirakını planlaşdırmır.
Layihənin həyata keçirilməsi 3,5 ilə hesablanıb. Birinci mərhələ Şəkinin sul ilə 100 faiz, Gəncənin isə 50 faiz təminin təzərdə tutur. Gəncənin su təchizatı sisteminin gələcək inkişafı ikinci mərhələ çərçivəsində nəzərdə tutulur. KfW layihənin effektivliyinin artırılması məqsədilə artıq suya tariflərin artırılması məsələsini qoymur, halbuki ilkin mərhələdə hökumət qarşısında bu məsələ irəli sürülüb. İndiki tariflər (bir kubmetr su üçün 0,22 manat) münasibdir, gələcəkdə isə sudan istifadəyə görə yığım əmsalının artırılacağı gözlənilir.
Layihə Gəncə və Şəki şəhərlərinin su təchizatı və kanalizasiya sistemlərinin keyfiyyətinin və etibarlığının yaxşılaşdırılmasını nəzərdə tutur. Layihənin birinci mərhələsinin büdcəsi 55 milyon avro təşkil edir. 2006-cı ilin oktyabında Berndə imzalanan sazişə uyğun olaraq, "KfW" layihənin həyata keçirilməsi üçün 37 milyon avro məbləğində kredit, İsveçrənin İqtisadi məsələlər üzrə Dövlət Katibliyi (SECO) qrant qismində 10 milyon avro ayırıb. Layihədə Azərbaycan hökumətinin payı 8 milyon avro təşkil edir.