Azərbaycan, Bakı, 21 dekabr /Trend, müxbir Ü.İsmayılova/
Azərbaycan Sığortaçılar Assosiasiyası (ASA) 2011-ci ildə ölkədə növbəti Azərbaycan beynəlxalq sığorta forumu keçirmək fikrindədir. Bu barədə çərşənbə axşamı ASA rəhbəri Azər Əliyev məlumat verib.
"Yerli sığorta şirkətləri artıq forumun keçirilməsinə hazırdırlar. Belə ki, dünya maliyyə böhranı başa çatdığından Azərbaycanın sığorta bazarı da tədricən bərpa olunmağa başlayıb", - Əliyev deyib.
Onun sözlərinə görə, forumun formatı haqqında danışmaq hələ tezdir, lakin onun keçirilməsi barədə qərar artıq qəbul olunub.
Birinci Azərbaycan beynəlxalq sığorta forumu 2008-ci il iyulun 10-11-də Bakıda keçirilib və Azərbaycanın sığorta bazarının inkişaf tendensiyalarına, Avropa ölkələrinin sığorta bazarlarının inkişaf təcrübəsinin Azərbaycanın sığorta sektorunun inkişafına təsiri, həyat sığortasının inkişafı, Azərbaycanın sığorta bazarının ölkənin maliyyə sistemi və sığortanın korporativ idarəetmə kimi təhlilinə həsr olunub.
Forumda Polşanın təkrar sığorta cəmiyyətinin, SFS şirkətinin, Rusiya sığorta cəmiyyətinin, Köln təkrar sığorta səhmdar cəmiyyətinin Moskva nümayəndəliyinin, "Allianz" QSC, ROSNO SŞ, "İnnostrax" və digər şirkətlərin nümayəndələri iştirak ediblər.
2009-cu və 2010-cu illərdə Azərbaycanda II forumun keçirilməsi sponsor dəstəyinin və forumun işində iştirak üçün kifayət qədər ərizənin olmaması səbəbindən ləğv olunub.
Azərbaycanda 27 sığorta və bir təkrar sığorta şirkəti fəaliyyət göstrərir. Bütün şirkətlər ASA-nın üzvləridir. Assosiasiyaya üzvlük haqqı 5 min manat təşkil edir. ASA 2006-cı ilin dekabrında yaradılıb.
