Azərbaycan, Bakı, 5 yanvar /Trend, müxbir N.İsmayılova/
Azərbaycan bankları 2011-ci ildə daha düşünülmüş fəaliyyətə hazırdırlar. Bu barədə çərşənbə günü Trend-ə Azərbaycan Banklar Assosiasiyasının (ABA) rəhbəri Eldar İsmayılov deyib.
"2010-cu ildə banklar həyata keçirdikləri bütün əməliyyatlara düşünülmüş və müştərilərinə daha dəqiq şəkildə yanaşıblar. Ötən il əksər Azərbaycan bankları üçün fəaliyyətin yenidən qiymətləndirilməsi ili olub. Onların çoxu 15-20 illik fəaliyyətlərini tamamlayaraq, öz yerlərini bazarda müəyyən ediblər", - İsmayılov qeyd edib.
Onun fikrincə, bütün bunlar banklara 2011-ci ildə daha ölçülüb-biçilmiş fəaliyyət aparmağa imkan verəcək.
"Bu il yerli banklar üçün daha sabit və daha gəlirli olacaq", - o qeyd edib.
Azərbaycan Mərkəzi Bankı öz növbəsində bank sektorunda maliyyə sabitliyinin təmini üçün 2011-ci ildə aşağıdakı məqsədlərin həyata keçirilməsini planlaşdırır:
- Kapitalın adekvatlığının qorunması;
- Likvidliyin optimal səviyyəsinin qorunması;
- Restrukturizasiyanın aparılması.
2011-ci ildə Mərkəzi Bankın tənzimləmə və nəzarət üzrə tədbirləri sabitlik və artım arasında optimal münasibətin təmininə yönəldiləcək. Böhrandan sonrakı dövrdə bank sektorunun sabit və davamlı artım mənbələrinə güvənməsi əhəmiyyət kəsb edir. Bu, maliyyə resurslarından sağlamlıq və uzunmüddətli iqtisadi inkişaf üçün istifadə edilməsinə görə lazımi şərtdir. Bunun üçün bankların resurs bazasında uzunmüddətli toplama mənbələrinin rolunun artması lazımdır.
Azərbaycan Mərkəzi Bankının məlumatına görə, 2010-cu il dekabrın 1-nə olan məlumata görə, ölkə banklarının ümumi aktivləri 12,697 milyard manat təşkil edib ki, bu da ilin əvvəlinə olan göstəricini 8,8 faiz ötür.
Noyabr ərzində Azərbaycanın bank sektorunun kapitallaşması 1,1 faiz, ilin əvvəlindən isə 8,5 faiz artaraq 2175,07 milyon manat təşkil edib.
Hesabat dövründə bank sisteminin ümumi gəliri 2009-cu ilin noyabrına nisbətdə 53,4 faiz azalıb və ötən aya nisbətdə 17,6 faiz artaraq 109,05 milyon manat təşkil edib.