...

Azərbaycanın prosessinq mərkəzi daha bir beynəlxalq ödəniş sistemində sertifikatlaşmadan keçib

Biznes və iqtisadiyyat xəbərləri Materials 6 Yanvar 2011 17:05 (UTC +04:00)

Azərbaycan, Bakı, 6 yanvar /Trend, müxbir N.İsmayılova/

"RoyalBank"ın strukturu olan "RoyalCard" prosessinq sistemi "MasterCard" beynəlxalq ödəniş sistemində sertifikatlaşmadan keçib. Bu barədə cümə axşamı bankdan məlumat verilib.

"Bu gün artıq yaxın vaxtlarda işə salınacaq sistemin testləşdirilməsi aparılır", - bankdan bildirilib.

Bundan əvvəl "RoyalBank" "RoyalCard" prosessinq sisteminin beynəlxalq VISA Int (VISA) ödəniş sisteminə birbaşa qoşulması üzrə sertifikatlaşmadan keçib, eləcə də JCB (Japan Credit Bureau) və CUP (China Union Pay) sistemlərinə birbaşa qoşulma layihələri üzrə yekun mərhələdədir.

Bu günədək bank 35 mindən artıq plastik kart buraxıb ki, onlardan 30 600 ədədi aktivdir. Kartların ümumi sayında "MasterCard" və VISA ödəniş sistemləri arasında bölünmə demək olar ki, bərabərdir. 2011-ci ilin sonunadək bank aktiv kartların sayını 60 min ədədə çatdırmağı planlaşdırır.

"RoyalCard" prosessinq sistemi 1,5 milyon kartla transaksiyaların keçirilməsi üçün kifayət qədər gücə malikdir. Bununla yanaşı, bir dəqiqə ərzində keçirilən transaksiyaların maksimum sayı 15 min təşkil edə bilər.

"RoyalBank" Azərbaycanda fəaliyyət göstərən kommersiya bankıdır, Bakıda və ölkənin rayonlarında 32 filiala malikdir. "RoyalBank" 1993-cü il avqustun 2-də "OZ Bank" birgə kommersiya bankı kimi təsis olunub.

Bu gün Azərbaycanda "RoyalCard"la yanaşı, daha dörd prosessinq mərkəzi - AzeriCard, MilliKart, TexKart və KapitalBank prossessinq fəaliyyət göstərir.

Xəbər lenti

Xəbər lenti