Azərbaycan, Bakı, 11 yanvar /Trend, müxbir N.İsmaylıova/
Azərbaycan Mərkəzi Bankı yanında Maliyyə Monitorinqi Xidməti 2011-ci ildə öz potensialının artırılmasına və cinayət yolu ilə əldə edilmiş pul vəsaitlərinin və terrorçuluğun maliyyələşdirilməsinə qarşı mübarizənin effektivliyinin artırılmasına, eləcə də korrupsiyanın qarşısının alınması və milli təhlükəsizliyin gücləndirilməsi siyasəti ilə daha sıx şəkildə sinxronlaşdırılmasına nail olunmasına yönəlib. Bu barədə çərşənbə axşamı xidmətin məlumatında deyilir.
Maliyyə Monitorinqi Xidmətinin direktoru Adışirin Qasımov iclas çərçivəsində xidmətin 2010-cu ilin yekunları üzrə fəaliyyətini bütün istiqamətlər üzrə müsbət qiymətləndirib.
Ötən il ərzində xidmət tərəfindən qarşıda qoyulan bütün məqsədlər həyata keçirilib: normativ hüquqi bazanın beynəlxalq standartlara uyğunlaşdırılması, Maliyyə Monitorinqi Xidmətinin institusional və funksional potensialının formalaşdırılması, monitorinq subyektlərinə metodoloji dəstəyin göstərilməsi, eləcə də ölkədaxili və beynəlxalq əməkdaşlığın yaradılması sahəsində uğurlar qazanılıb.
2010-cu ildə Maliyyə Monitorinqi Xidməti 22 ölkə ilə cinayət yolu ilə əldə edilmiş pul vəsaitlərinin və terrorçuluğun maliyyələşdirilməsinə qarşı mübarizə sahəsində Anlaşma Memorandumunun imzalanmasına dair razılığa gəlib. Hazırda Azərbaycan bu sahədə Beynəlxalq Valyuta Fondu, Dünya Bank, ATƏT, USAID ilə əməkdaşlıq edir.
İclas çərçivəsində Qasımov 2011-ci ilin fəaliyyəti üzrə xidmətin bütün struktur bölmələrinə konkret tapşırıqlar verib.
