Azərbaycanın qızıl hasilatı şirkətinin səhm kapitalında dəyişiklik baş verib
Azərbaycan, Bakı, 12 yanvar /Trend, müxbir N.İsmayılova/
Azərbaycanda qızıl hasilatı ilə məşğul olan "Anglo-Asian Mining plc" şirkətinin qeyri-icraçı direktoru Riçard Raund şirkətin kapitalındakı payından səhmlərin bir hissəsini satıb. Bu barədə çərşənbə günü şirkətdən verilən məlumatda deyilir.
Məlumata görə, Riçard Raund bazar ertəsi 60 min səhmin hər birini 78,5 pensə satıb. Satılan səhm paketinin ümumi həcmi 47,1 min funt edir. Bu transaksiyanın həyata keçirilməsilə Raundun mülkiyyətində şirkətin 153 958 səhmi qalır.
2010-cu il mayın sonlarına olan məlumata görə, şirkətin nisbətən ən iri səhmdarları səhmlərin 29,92 faizinin (32 796 830 səhm) məxsus olduğu Reza Vəziri, Xaqani Bəşirov - 16,5 faiz (18 087 758 səhm), Con Sununu - 9,79 faiz (10 734 540 səhm), Resource Capital Fund III L.P. - 5,89 faiz (6 459 523 səhm), Limelight Industrial Developments Limited - 3,68 faiz (4 038 600 səhm) şirkətidir. Göstərilən tarixdə şirkətin cəmi 109 616 840 səhmi buraxılıb.
"Anglo Asian Mining PLC" şirkəti 1997-ci ilin avqustunda Azərbaycan hökuməti ilə imzalanan PSA tipli məhsulun pay bölgüsü sazişi əsasında Azərbaycanın cənub-qərbində yerləşən altı - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü" yataqlarının işlənməsi hüququna malikdir.
Azərbaycan hökuməti və Azərbaycan Beynəlxalq Mədən Əməliyyat Şirkəti (AIMROC) arasında imzalanan 30 illik PSA sazişində Azərbaycanın payı 51 faiz, Britaniyanın "Anglo-Asian Mining Plc" şirkətinin payı isə 49 faiz təşkil edir.
