Azərbaycan, Bakı, 19 yanvar /Trend/
2010-cu ildə Azərbaycanın nəqliyyat sektorunda 196,3 milyon ton müxtəlif yüklər daşınıb ki, bu da 2009-cu ildə olduğundan 3,1 faiz çoxdur. Bu barədə cərşənbə günü Azərbaycan Dövlət Statistika Komitəsi məlumat verib.
"Bu, ölkənin müstəqillik əldə etməsindən sonra əldə olunan ən yüksək göstəricidir", - Statistika Komitəsindən bildiriblər.
2010-cu ildə daşınan yüklərin ümumi həcminin 73,9 faizi özəl sektorun payına düşür. Ötən il yüklərin ümumi həcminin 50,9 faizi avtomobil nəqliyyatı, 31,8 faizi boru kəmərləri, 11,3 faizi dəmiryol, 6 faizi isə dəniz nəqliyyatı ilə daşınıb.
2010-cu ildə 1,4 milyard sərnişin daşınıb ki, bu da 2009-cu ilin göstəricisindən 4,5 faiz çoxdur. Sərnişinlərin əsas hissəsi (86,5 faiz) avtomobil nəqliyyatı və metro ilə (13,1 faiz) daşınıb.
Dəmiryol nəqliyyatı ilə 22,2 milyon ton müxtəlif yüklər daşınıb ki, bu da 2009-cu ilin göstəricisindən 6,6 faiz çoxdur.
Dəniz nəqliyyatı ilə 11,7 milyon ton müxtəlif yüklər daşınıb. Bu, ötən ildə olduğundan 11,2 faiz azdır. Daşınan yüklərin bütün həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi ötən il 10,8 milyon ton təşkil edib ki, bu da ötən ildəkindən 26,2 dəfə çoxdur.
Avtomobil nəqliyyatı ilə 99,9 milyon ton yük daşınıb. Bu, 2009-cu ildəkindən 6 faiz çoxdur. Sərnişindaşımanın həcmi 1,2 milyard nəfər (artım 7,7 faiz) təşkil edib. Sərnişinlərin 96,5 faizi avtobuslarla, 3,5 faizi minik avtomobilləri ilə daşınıb.
Metropolitenlə sərnişindaşımanın həcmi 181,1 milyon nəfər təşkil edərək 12,1 faiz azalıb.
2010-cu ildə hava nəqliyyatı ilə bir milyon sərnişin daşınıb. Daşımaların həcminin 21,2 faizi özəl sektorun payına düşüb.
Ötən ilin yanvar-noyabrında Avrasiya nəqliyyat dəhlizi ilə Azərbaycan ərazisindən 47,2 milyon ton yük daşınıb ki, bu da 2009-cu ilin analoji dövr göstəricisindən 8,8 faiz çoxdur. Yanvar-noyabr aylarında dəhliz çərçivəsində 205,2 milyon nəfər daşınıb ki, bu da 2009-cu ilin yanvar-noyabr aylarında olduğundan 8,2 faiz çoxdur.
