Azərbaycan, Bakı, 19 yanvar /Trend, müxbir A.Axundov/
Türkiyə sahibkarları Azərbaycanda işin ən cazibədar tərəfini dövlətin öz iqtisadiyyatını diversifikasiya etmək səyi hesab edirlər. Bu barədə çərşənbə günü Trend-ə Türkiyənin Baş naziri yanında Xəzinədarlıq Katibliyinin bank və valyuta idarəetməsi şöbəsinin rəhbəri Samih Güven deyib.
"Xəzinədarlıq Katibliyinin xaricdə, xüsusilə də Azərbaycanda işləyən Türkiyə sahibkarları arasında aprdığı sorğuya əsasən, Azərbaycanda işin ən cazibədar tərəfi ölkənin öz iqtisadiyyatını diversifikasiya etmək səyidir", - Güven qeyd edib.
Ankara Ticarət Palatasının məlumatına əsasən, 2010-cu ilin yekunları üzrə Azərbaycana yatırılan türk investisiyalarının 94 faizindən çoxu energetika sektorunun payına düşür.
Güvenin sözlərinə görə, son illərdə Azərbaycan iqtisadiyyatının qeyri-neft sektoruna türk investisiyalarının müəyyən artımı müşahidə edilir, lakin bu bir o qədər də çox deyil.
"2011-ci ildə biz Azərbaycanın qeyri-neft sektoruna Türkiyə investisiyalarının böyük artımını gözləmirik", - Güven bildirib.
Onun sözlərinə görə, Azərbaycan iqtisadiyyatına Türkiyə investisiyalarının əksəriyyəti burada yaradılan şirkətlərin və ya filialların açılması vasitəsilə deyil, neft-qaz layihələrində iştirak yolu ilə həyata keçirilib. Bununla belə, onun sözlərinə görə, tədricən belə yatırımların payı azalacaq.
"Şahdəniz" qaz-kondensat yatağında 9 faizlik iştirak payına malik olan Türkiyənin dövlət neft şirkəti TPAO-un məlumatına əsasən, 2009-cu ildə şirkətin Azərbaycan iqtisadiyyatına ümumi investisiyaları ölkədə işin bütün dövrü ərzində 3,9 milyard dolları ötüb.
Türkiyə xəzinədarlığının 2010-cu il sentyabrın sonuna olan statistik məlumatlarına görə, Azərbaycanda Türkiyə investisiyaları 3,825 milyard dollara çatıb. Onların 3,573 milyard dolları Azərbaycanın energetika sektoruna qoyulub. Azərbaycanın bank sektoruna 17,588 milyon dollar, ticarətə 15,908 milyon dollar, informasiya texnologiyaları və rabitə sektoruna 169,062 milyon dollar, istehsal sektoruna 40,181 milyon dollar, tikintiyə 4,906 milyon dollar, filiz mədən sənayesinə 2,066 milyon dollar, sığortaya 650,9 min dollar, başqa sahələrə 1,03 milyon dollar investisiya yatırılıb.
2010-cu ilin doqquz ayı ərzində Türkiyə investorları Azərbaycan iqtisadiyyatına 3,971 milyon dollar sərmayə qoyublar, eləcə də üç türk şirkəti yaradılıb. 2009-cu ildə beş şirkət yaradılıb və 304,666 milyon dollar investisiya yatırılıb.
Türkiyə investorları 103 ölkədə 3500-ə yaxın şirkətdə əsasən energetika, bank sektoru, informasiya texnologiyaları, rabitə, emal sənayesi və ticarət sahələrində fəaliyyət göstərirlər.
