Azərbaycan, Bakı, 3 fevral /Trend, müxbir A.Axundov/
Türkiyədə azərbaycanlı turistlər çox xərcləyən turist statusu əldə edirlər. Bu barədə Türkiyənin mədəniyyət və turizm naziri Ərtoğrul Günay Trend-ə müsahibəsində bildirib.
"Türkiyəyə səfər edən azərbaycanlı turistlərin profilinin araşdırılması onların əsasən turizm regionlarına üstünlük verdiklərini aşkara çıxarıb və onlar xərcləri yüksək olan turist statusu əldə edirlər. 2010-cu ildə bu tendensiya davam edib", - Günay bildirib.
Onun sözlərinə görə, orta yuxarı gəlirli Azərbaycan vətəndaşları xidmətin keyfiyyət və dəyərini müqayisə edərək, istirahət yeri seçərkən Türkiyənin yerli turizm obyektlərinə üstünlük verirlər.
Türkiyəli nazirin sözlərinə görə, "Türk Hava Yolları" Azərbaycandan gündəlik reyslər, ümumilikdə həftədə 21 reys həyata keçirir. Azərbaycanın AZAL şirkəti həftədə Bakı-İstanbul istiqamətində müntəzəm olaraq 13, Bakı-Ankara xətti üzrə 2 reys həyata keçirir. 2008-ci ilin yayından AZAL Bodrum və Antalyaya 4, 2009-cu ilin yayından 8 reys həyata keçirir.
"Aviadaşımaların sayının çoxalması Azərbaycanın Türkiyəyə marağının artmasının göstəricisidir", - Günay bildirib.
Bununla yanaşı, onun sözlərinə görə, Gürcüstan və İrandan turist axını ilə müqayisədə azərbaycanlı turistlərin sayında artım yetərli deyil.
"Azərbaycanlı turistlər üçün Türkiyə eyni dildə danışan, viza problemi olmayan, eyni adət-ənənələrə malik ölkədir. Azərbaycan vətəndaşları Türkiyədə özlərini vətəndəki kimi hiss edirlər. Azərbaycanlı turistlərin sayındakı artım göstəricisi əlbəttə ki, yetərli deyil", - Günay bildirib.
Türkiyənin Mədəniyyət və Turizm Nazirliyinin məlumatına görə, 2010-cu ildə 486 381 Azərbaycan vətəndaşı Türkiyəyə səfər edib ki, bu da ötən ilin göstəricidən 14,67 faiz çoxdur. 2009-cu ildə Türkiyəyə 424 155 Azərbaycan vətəndaşı səfər edib.
Türkiyə Statistika İnstitutunun məlumatına görə, 2010-cu ildə Türkiyəyə 441468 Azərbaycan vətəndaşı səfər edib. 2010-cu ildə 441468 Azərbaycan vətəndaşı Türkiyəyə gedib ki, onlardan 112055 nəfərin səfərində məqsəd doğma və yaxınlarla görüş, 100167 - səyahət və istirahət, 44269 nəfər - ticarət, 30058 -iş (konfranslar, görüşlər və s.), 12822 - müalicə, 7069 - təhsil, 1556 - dini məqsədlər, 685 - tranzit, 132788 nəfərdə isə digər məqsədlər olub.