Azərbaycan, Bakı, 3 fevral /Trend, müxbir A.Axundov/
Azərbaycanda turizm sektorunun daha da inkişaf etməsi üçün ölkənin özəl sektoruna dəstək göstərilməsi vacibdir. Bu barədə Türkiyənin mədəniyyət və turizm naziri Ərtoğrul Günay cümə axşamı Trend-ə müsahibəsində bildirib.
"Azərbaycanda turizmin inkişafı özəl sektorun bu prosesə aktiv qoşulması ilə bağlıdır", - Günay deyib.
Onun sözlərinə görə, Azərbaycanın turizm sektoru sürətli templərlə inkişaf edir və ölkədə otellərin beynəlxalq şəbəkəsi işləməyə başlayıb.
"Azərbaycanın turizm sektoru sürətli templərlə inkişaf edir. İnkişaf ölkədə turizmin bütün sahələrində, xüsusilə də işgüzar turizm sahəsində müşahidə olunur", - Günay bildirib.
Prezident İlham Əliyev 2011-ci ili ölkədə "Turizm ili" elan edib.
Mədəniyyət və Turizm Nazirliyinin məlumatına görə, 2010-cu ildə Azərbaycana səfər edən xarici vətəndaşların sayı 1,85 milyon nəfər təşkil edib ki, bu da 2005-ci ilə nisbətən 1,6 dəfə çoxdur. Ölkədə fəaliyyət göstərən turizm şirkətlərinin sayı 214-ə, mehmanxana və mehmanxana tipli obyektlərin sayı 2005-ci illə müqayisədə təxminən iki dəfə artaraq, 262-dən 477-yə çatır və onların 80 faizi regionlarda yerləşir.
Türkiyənin Mədəniyyət və Turizm Nazirliyinin məlumatına görə, 2010-cu ildə 486 381 Azərbaycan vətəndaşı Türkiyəyə səfər edib ki, bu da ötən ilin göstəricidən 14,67 faiz çoxdur. 2009-cu ildə Türkiyəyə 424 155 Azərbaycan vətəndaşı səfər edib.
Türkiyə Statistika İnstitutunun məlumatına görə, 2010-cu ildə Türkiyəyə 441468 Azərbaycan vətəndaşı səfər edib. 2010-cu ildə 441468 Azərbaycan vətəndaşı Türkiyəyə səfər edib ki, onlardan 112055 nəfərin səfərinin məqsədi doğma və yaxınlarla görüş, 100167 - səyahət və istirahət, 44269 nəfər - ticarət, 30058 -iş (konfranslar, görüşlər və s.), 12822 - müalicə, 7069 - təhsil, 1556 - dini məqsədlər, 685 - tranzit, 132788 nəfərin səfərində isə digər məqsədlər olub.
