Azərbaycan, Bakı, 9 fevral /Trend, müxbir Ü.İsmayılova/
Azərbaycan Qiymətləndiricilər Cəmiyyəti qiymətləndirmə fəaliyyəti bazarında göstərilən xidmətlərin keyfiyyətinin artırılması üzrə tədbirlər görür. Trend-in məlumatına görə, bu barədə çərşənbə günü Azərbaycan Qiymətləndiricilər Cəmiyyətinin koordinatoru Amil İsmayılov deyib.
"Bu məqsədlə Bakıda qiymətləndirmə fəaliyyətinin mütəxəssisləri üçün Beynəlxalq Əmlak Fondunun eksperti tərəfindən keçirilən kurslar başlayacaq", - İsmayılov deyib.
Onun sözlərinə görə, kurslar fevralın 28-dən martın 4-dək keçiriləcək.
Azərbaycan Qiymətləndiricilər Cəmiyyəti 1997-ci ildə qeydiyyatdan keçib. Azərbaycanda qiymətləndirmə fəaliyyəti 1995-ci ildə qəbul edilmiş "Qiymətləndirmə fəaliyyəti haqqında" qanunla tənzimlənir. Təşkilat bütün qiymətləndiriciləri özündə birləşdirir.
Beynəlxalq Əmlak Fondu 1992-ci ildən fəaliyyət göstərir. Bu günə fond daşınmaz əmlak bazarının dünya standartlarına çatdırılmasında dünyanın 17 ölkəsinə yardım göstərib.