Azərbaycan, Bakı, 9 fevral /Trend,müxbir Ü.İsmayılova/
Azərbaycan Qiymətləndiricilər Cəmiyyəti apreldən avtomobillərin qiymətləndirmə metodologiyası üzrə kursların keçirilməsinə başlayacaq. Trend-in məlumatına görə, bu barədə çərşənbə günü Azərbaycan Qiymətləndiricilər Cəmiyyətinin koordinatoru Amil İsmayılov deyib.
"Qiymətləndirmə fəaliyyəti üzrə kursları Azərbaycan Dövlət İqtisad Universiteti və Azərbaycan Texniki Universitetindən olan yerli mütəxəssislər aparacaqlar",- İsmayılov deyib.
Azərbaycanda xüsusilə avtomobillərin kreditləşdirilməsi fəal surətdə inkişaf edir ki, bu da belə metodologiyanın işlənməsinə səbəb olur. Avtomobillərin qiymətləndirilməsi üzrə kurslar əsasən yerli bank və sığorta şirkətləri üçün keçiriləcək.
Onun sözlərinə görə, kurslar başa çatdıqdan sonra dinləyicilər ölkənin qiymətləndirmə şirkətlərində təcrübə keçə biləcəklər.
Azərbaycanda qiymətləndirmənin fəaliyyəti 1995-ci ildə qəbul edilmiş "Qiymətləndirmə fəaliyyəti haqqında" qanunla nizamlanır.
