Azərbaycan, Bakı, 9 fevral / Trend, müxbir Ü.İsmayılova /
Azərbaycan Dövlət Memarlıq və Şəhərsalma Komitəsinin nümayəndələri və Bakı buxtası üzərindən körpünün tikintisi layihəsinin texniki-iqtisadi əsaslandırılmasının (TİƏ) hazırlanması üzrə tenderin qalibi olmuhş Koreyanın Dong Sang Engineering şirkətinin mütəxəssisləri layihənin memarlıq xüsusiyyətlərini müzakirə ediblər. Bu barədə komitənin çərşənbə günü yaydığı məlumatda deyilir.
Məlumatda bildirilir ki, görüş zamanı körpünün dayaq və digər hissələrinin dizaynının milli memarlıq elementləri mövzusunda peşəkar müzakirələr aparılıb.
Görüşün yekunları üzrə komitənin sədri Abbas Ələsgərov körpünün konstruktiv xüsusiyyətlərinin və dizaynının bir neçə variantının hazırlanmasını tövsiyə edib.
Bir müddət əvvəl Azərbaycanın nəqliyyat nazirinin müavini Musa Pənahovun dediyinə görə, may ayında koreyalı mütəxəssislər TİƏ-nin hazırlanması və Bakı buxtası üzərindən körpünün ilkin dizaynının hazırlanması üzrə işləri başa çatdıracaqlar.
Onun sözlərinə görə, hazırda yeni körpünün TİƏ-nin hazırlanması üzrə işlər davam etdirilir. Görülən işlərin yekunu üzrə TİƏ və körpünün ilkin dizaynı Nəqliyyat Nazirliyinə təqdim olunacaq.
"Onun yerləşəcəyi yerin, daha doğrusu Nargin adasına və ya buxtaya yaxın olması üzrə bir neçə variant mövcuddur", - Pənahov deyib.
Körpünün tikilməsi haqda müsbət qərar qəbul edilərsə, injinirinq üzrə hərtərəfli işlərə başlanacaq.
Yeni körpü Bakı buxtasının iki tərəfini (Bayıl və Zığ qəsəbələri zonasında) birləşdirməli və paytaxtın nəqliyyat infrastrukturunun yükünün azaldılmasına kömək etməlidir. Körpünün dəniz hissəsi 14 kilometr təşkil edəcək. Bu körpünün tikintisi üzrə işlərin 5 il ərzində başa çatdırılması planlaşdırılır.
