Azərbaycan, Bakı, 17 fevral /Trend, müxbir N.İsmayılova/
İsveçrənin İqtisadi Məsələlər üzrə Dövlət Katibliyi (SECO) Azərbaycanın dövlət sektorunda hesabat layihəsi (CAPSAP) üzrə strateji planın icmalını aparmaq üçün məsləhətçini seçib. Trend-in məlumatına görə, bu barədə cümə axşamı İsveçrə əməkdaşlıq ofisinin Cənubi Qafqaz üzrə milli proqramının rəhbəri Nailə Səfərova deyib.
"Dünya Bankı (DB) və Azərbaycan hökuməti SECO-nun qrantının ayrılmasının təmini məqsədilə layihə üzrə qrant sazişi imzalamaq niyyətindədirlər", - Səfərova bildirib.
Bundan əvvəl layihə çərçivəsində tender elan edilib və artıq strateji planın icmalını aparan xarici məsləhətçi seçilib, lakin DB ilə sazişin hələ imzalanmaması səbəbindən SECO pul ayıra bilmir. Məsləhətçi Almaniyadan cəlb edilib.
SECO ölkənin Hesablama Palatası ilə birgə həyata keçirilən layihənin subkomponentinin maliyyələşdirilməsinə 2 milyon dollar həcmində qrant ayırır.
Həyata keçirilməsi 2012-ci il dekabrın sonunadək davam edəcək layihənin ümumi dəyəri 24 milyon dollar təşkil edir. Layihə üzrə kredit sazişi 2008-ci ilin sentyabrında imzalanıb. Layihə DB-nin 11 milyon dollar məbləğində krediti, Yaponiyanın PHRD fondunun (3 milyon dollar) və SECO-nun (2 milyon dollar) qrantları və Azərbaycan hökumətinin payı (8 milyon dollar) hesabına maliyyələşdirilir.
Azərbaycan kommersiya sektoru üçün artıq 28 milli standart hazırlayıb. Dünyada maliyyə hesabı və auditinin 35 standartı mövcuddur. Ölkədə IRFS-ə keçid dövlət sektoru üçün 2008-ci il yanvarın 1-dən başlayıb.
