Azərbaycan, Bakı, 21 fevral /Trend, müxbir N.İsmayılova/
Azərbaycanın kiçik şəhərlərində su təchizatı və kanalizasiya sistemlərinin yaxşılaşdırılmasının birinci və ikinci layihələrinin reallaşdırılması prosesinin icmalı məqsədilə Dünya Bankının missiyası ölkəyə gəlib. Bu barədə bazar ertəsi DB-nin Bakı nümayəndəliyindən bildiriblər.
"Tərkibinə layihənin rəhbəri Manuel Marino və su təchizatı sektoru üzrə menecer Vael Zakutun daxil olduğu missiya fevralın 21-dən 27-dək Azərbaycanda olacaq", - nümayəndəlikdən bildiriblər.
Missiyanın əsas məqsədi su təchizatı sistemlərinin yaxşılaşdırılması üzrə layihələrin reallaşdırılmasının gedişinin icmalı və müzakirəsidir.
DB 22 rayonu əhatə edən birinci su layihəsi üçün 230 milyon dollar ayırıb. Layihənin ümumi dəyəri 310 milyon dollardır. 2010-cu ilin avqust ayına olan məlumata görə, DB-nin ayırdığı maliyyə vəsaitinin ümumi həcmindən 8,9 milyon dollar istifadə olunub. Birinci layihənin həyata keçirilməsi nəticəsində ən azı 700 min nəfər su ilə təmin olunacaq, eləcə də onlar kanalizasiya xidmətlərindən istifadə edə biləcəklər. Bu layihənin 2012-ci ilədək həyata keçirilməsi nəzərdə tutulub.
DB-nin kiçik şəhərlərdə su təchizatı, kanalizasiya sistemi və kanalizasiya sistemlərinin yaxşılaşdırılması üzrə ikinci layihəsi Azərbaycanın 21 rayonunu əhatə edir, onlardan beşi Naxçıvan Muxtar Respublikasında yerləşir. Qalanları isə Kürdəmir, Ucar, Zərdab və ölkənin digər rayonlarıdır. Layihə 2008-ci ildə start götürüb və onun 2013-cü ilin fevralınadək başa çatdırılması planlaşdırılıb. Layihənin ümumi dəyəri 410 milyon dollar təşkil edir ki, burada DB-nin payı 260 milyon dollardır. Bu məbləğin 30 milyon dolları BİA tərəfindən ayrılıb. 2010-cu ilin avqust ayına olan məlumata görə, ayırılan vəsaitin ümumi həcmindən 3,3 milyon dollar istifadə olunub.
