Azərbaycan, 15 mart /Trend, müxbir E.İsmayılov/
Martın 24-25-də Tbilisidə TRACECA (Avropa-Qafqaz-Asiya) nəqliyyat dəhlizi çərçivəsində regional işçi qrupunun iclası keçiriləcək. İclasda Cənubi Qafqazın üç respublikası və Türkiyə iştirak edəcək. Bu barədə çərşənbə axşamı Trend-ə TRACECA-nın Azərbaycandan olan milli katibi Akif Mustafayev deyib.
Onun sözlərinə görə, iclas yerüstü nəqliyyatın təhlükəsizlik məsələsi ilə bağlı keçiriləcək.
Görüş zamanı müzakirə ediləcək əsas mövzular sürücülərin iş və istirahəti, beynəlxalq daşımaların təhlükəsizliyi, rəqəmsal taxoqrafların tətbiqi, yolların vəziyyəti olacaq.
Azərbaycanı iclasda Nəqliyyat Nazirliyinin iki nümayəndəsi təmsil edəcək. Onlardan biri təhlükəsizlik, digəri hüquqi məsələlər üzrə mütəxəssisdir.
TRACECA Aİ və onun Şərqi Avropa, Cənubi Qafqaz və Mərkəzi Asiyadakı tərədaş ölkələri arasında nəqliyyat sahəsində beynəlxalq əməkdaşlıq proqramıdır. Təşkilatın Bakıda daimi katibliyi var.
Hazırda TRACECA-nın iştirakçı dövlətləri Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna və İrandır.