Azərbaycanın yeganə təkrarsığorta şirkəti kapitalını iki dəfədən çox artırır

Azərbaycan, Bakı, 17 mart /Trend, müxbir Ü.İsmayılova/

Azərbaycanın yeganə təkrarsığorta şirkəti "AzRe Təkrarsığorta" nizamnamə kapitalını hazırkı 10,86 milyon manatdan 25,8 milyon manatadək artırır. Bu barədə şirkətin idarə heyətinin sədri Vüsal Abbasov bildirib.

"Şirkətin nizamnamə kapitalı 2010-cı ildə əldə olunan mənfəət hesabına artırılır", - Abbasov deyib.

Onun sözlərinə görə, kapitalın artırılması şirkət üçün aktualdır, çünki bu, risklərin saxlanması və xarici bazarlara çıxış üçün vacibdir.

2010-cu il üzrə şirkətin yığımları ilə bağlı Abbasov bildirib ki, ötən il üzrə mükafatlar 21 milyon manatı ötüb və bu göstərici 2009-cu ilin yekunlarına dair rəqəmlərə, demək olar, bərabərdir.

Qiymətli Kağızlar üzrə Dövlət Komitəsi martın1-də "AzRe Təkrarsığorta" şirkətinin sadə sənədsiz adlı səhmlərini qeydiyyata alıb. Emissiya çərçivəsində hər birinin nominal dəyəri 12 900 manat olan 2 000 səhm buraxılıb. Emissiyanın yerləşdirilməsi əvvəllər qeydiyyata alınmış və hər birinin nominal dəyəri 5 430 manat olan emissiyanın səhmə çevrilməsi yolu ilə aparılacaq.

Azərbaycanın birinci təkrar sığorta şirkəti "AzRe Təkrarsığorta" 7 noyabr 2007-ci ildə təkrar sığorta fəaliyyəti həyata keçirmək üçün Azərbaycanın Maliyyə Nazirliyindən lisenziya alıb. Şirkətin səhmdarları altı fiziki şəxsdir. Şirkət yerli və regional sığorta, təkrar sığorta şirkətləri və təkrarsığota vasitəçiləri ilə əmlak, tikinti-quraşdırma riskləri, su, hava və avtomobil nəqliyyat vasitələri, yüklər, bədbəxt hadisələr, məsuliyyət və maliyyə risklərinin sığortası üzrə xidmət göstərir.