Azərbaycan, Bakı, 31 mart /Trend, müxbir N.İsmayılova/
2010-cu ilin yekunları üzrə özəl sektora cəlb edilən birbaşa dövlət və dövlət zəmanətli kredit və borcların, depozit və digər kapital qoyuluşlarının xüsusi çəkisi xarici investisiyaların ümumi həcminin 59,7 faizini təşkil edib. Trend-in məlumatına görə, bu barədə cümə axşamı Azərbaycan Mərkəzi Bankının saytında dərc edilən ödəniş balansında deyilir.
Bilavasitə dövlət və dövlət zəmanəti ilə 14,8 faiz (735,5 milyon dollar) cəlb edilib. Zəmanətsiz kreditlərin payına 2635,3 milyon dollar (53 faiz), digər investisiyaların payına isə 1,595 milyard dollar düşür.
Zəmanətsiz kreditlərin 1686,6 milyon dolları banklar, 667,6 milyon dolları neft-qaz sektoru, 281,1 milyon dolları digər müəssisə və firmalar tərəfindən cəlb edilib.
Əvvəllər cəlb edilən kreditlərin ümumi həcmindən 2052 milyon dolları qaytarılıb. Qaytarılan kreditlərin 44,3 faizi (909,9 milyon dollar) bank sisteminin, 12,3 faizi (252,2 milyon dollar) dövlət və dövlət zəmanətli kreditlərin, 30 faiz (615,9 milyon dollar) neft-qaz sektorunun, 13,4 faiz (274,1 milyon dollar) digər müəssisə və firmaların payına düşür.
