Azərbaycan, Bakı, 6 aprel /Trend, müxbir N.İsmayılova/
Proqnozlara görə, 2011-ci ildə neftin qiymətlərinin artacağı və 2012-ci ildə də yüksək olaraq qalacağı səbəbindən Azərbaycan hökuməti üçün əsas vəzifə makroiqtisadi sabitliyi saxlamaq olacaq. Asiya İnkişaf Bankının (AİB) "Asiyanın inkişaf perspektivləri-2011" hesabatında deyilir.
Neft gəlirlərinin artması bundan sonra da sosial xərclərin və infrastruktura investisyaların qoyuluşunun artırılmasına imkan verəcək ki, bu da özəl sektoru stimullaşdırmalı və investisiya mühitini yaxşılaşdırmalıdır.
Gözlənildiyinə görə, neft-qaz sektoru təxminən 3-4 faiz artacaq, çünki bu sektorun inkişafı sonrakı illərdə də sürətli genişlənmə üçün əsas yaradacaq. Bankın gözləntilərinə görə, iqtisadiyyatın qeyri-neft sektorunda güclü artım dövlət sektorunun investisiyaları hesabına şərtlənəcək. Hökumət 2011-ci ildə qeyri-neft sektoruna 4,2 milyard dollar sərmayə qoymağı planlaşdırır ki, bu da tikintidə sürətli artıma səbəb olacaq və iqtisadiyyatın digər sektorları üçün yaxşı nəticələnəcək.
Kənd təsərrüfatı sektoru əlverişli hava şəraiti, dövlətin daimi dəstəyi, eləcə də ƏDV-dən azad edilmə və əsas aqrolizinq şirkətlərindən birinin ssuda faizinin azalması səbəbindən artmaqda davam edəcək. Bankın proqnozlarına görə, 2011-2012-ci illərdə Azərbaycanın qeyri-neft sektorunda artım 8 faiz səviyyəsində nəzərdə tutulub. ÜDM-in ümumi artımı 2011 və 2012-ci illərdə 5,8 faiz səviyyəsində proqnozlaşdırılır.
Mərkəzi Bankın siyasəti inflyasiya saxlanılmaqla iqtisadiyyatın qeyri-neft sektorunun kreditə tətləbatının ödənilməsinə yönəldiləcək. Halbuki qiymət artımları çox güman ki, əsasən xarici amillər hesabına müşahidə olunacaq.
Mübadilə məzənnəsi ödəniş balansındakı böyük profisit səbəbindən bir qədər yüksək təzyiqə məruz qalacaq, lakin AMB buna mane olacaq, çünki bu qeyri-neft sektorunu dayandıracaq. Proqnozlara görə, inflyasiya 2011-ci ildə 7,5 faiz təşkil edəcək və 2012-ci ildə 7 faizədək azalacaq.
Gözlənildiyinə görə, cari əməliyyat hesabı profisiti 2011-ci ildə ÜDM-in 27,8 faizi və 2012-ci ildə 25 faizi səviyyəsində olacaq.
