Azərbaycan, Bakı, 18 aprel /Trend, müxbir N.İsmayılova/
2011-ci ilin birinci rübündə Azərbaycanda sənaye istehsalı (məhsul istehsalı və sənaye xarakterli xidmətlərin göstərilməsi) 7,5 milyard manat təşkil edib ki, bu da 2010-cu ilin müvafiq dövr göstəricisindən 0,3 faiz çoxdur. Bu barədə bazar ertəsi Trend-ə Dövlət Statistika Komitəsindən bildiriblər.
Ötən ilin müvafiq dövrü ilə müqayisədə özəl sektorun payı 0,1 faiz artaraq sənaye istehsalının ümumi həcminin 79,5 faizini təşkil edib. Bu zaman 91,9 faiz sənaye mallarının, 8,1 faiz isə sənaye xarakterli xidmətlərin payına düşüb. Qeyri-neft sektorunda məhsul istehsalı 9,8 faiz artıb.
Hesabat dövründə hasilat sənayesində istehsalın həcmi 1,3 faiz azalaraq sənaye istehsalının bütün həcminin xüsusi çəkisinin 74 faizini, yəni 5,5 milyard manat təşkil edib. Bu dövr ərzində hasil olunan neftin həcmi 12 milyon ton, təbii qaz hasilatı isə 6,3 milyard kubmetr olub.
Emal sənayesinin həcmi 1,4 milyard manat təşkil edərək 3,4 faiz artıb. Birinci rüb ərzində avtomobil, qoşqu və yarımqoşquların (2,45 dəfə), elektrik avadanlıqlarının (2,35 dəfə), metallurgiya sənayesi (13,4 faiz) və kimya sənayesi (54,2 faiz) istehsalında xeyli artım müşahidə olunub.
Qida məhsullarının istehsalında da artım müşahidə edilib. Bu zaman ölkədə kolbasa məhsullarının istehsalı 6,2 faiz artaraq 491,1 ton, ət - 2,2 faiz (63 min ton), süd - 5,4 faiz (177,2 min ton), kərə yağı - 0,8 faiz (5,3 min ton), pendir və kəsmik - 2,2 faiz (11,1 min ton), qənd - 69 faiz (88,9 min ton) təşkil edib.
Aprelin 18-nə olan rəsmi məzənnə 0,7917 AZN/USD təşkil edir.
