Azərbaycan, Bakı, 19 aprel /Trend, müxbir N.İsmayılova/
Asiya İnkişaf Bankı (AİB) Azərbaycanda biznes fəaliyyət üzrə yeni strateji planın bu ayın sonuna təsdiq ediləcəyini gözləyir. Bu barədə çərşənbə axşamı AİB-in Azərbaycandakı nümayəndəliyinin rəhbəri Olli Norojono deyib.
"İndi biz bu strateji planının bəyənilməsi prosesindəyik və artıq maliyyələşdirməyə və fəaliyyətin əhatə dairəsinə aid olan bütün məsələlər dəqiqləşdirilib. Sənəd martın sonunda ilk dəfə gözdən keçirilib və indi ikinci dəfə baxılma mərhələsindədir. Onun bu həftənin sonuna başa çatması gözlənilir", - Norojono qeyd edib.
Onun sözlərinə görə, bu prosesdə yubanma halları olub, lakin gözlənilir ki, bank menecmenti tərəfindən strateji plan bəyənildikdən sonra o aprelin sonunda baxılmaq üçün AİB Direktorlar Şurasına təqdim ediləcək.
Nümayəndəlik rəhbərinin sözlərinə görə, bank ölkənin iqtisadiyyat sektorlarında işi davam etdirəcək. Prioritetlər energetika, nəqliyyat və su sektorlarıdır.
AİB ölkənin həm dövlət, həm də özəl sektorunda energetika, nəqliyyat, şəhər təsərrüfatı sahələrində layihələr həyata keçirir. Azərbaycan 1999-cu ildən AİB-in üzvüdür. Bankın ölkə üzrə kredit portfeli 700 milyon dollara çatır. Əməkdaşlıq dövrü ərzində AİB Azərbaycan hökumətinə və yerli şirkətlərə ümumi məbləği 13,122 milyon dollar olan qrant ayırıb.
