Azərbaycan, Bakı, 20 aprel /Trend, müxbir A.Axundov/
Azərbaycan Respublikası Dövlət Neft Fondu (ARDNF) 2011-ci ildə Azərbaycanda böyük infrastuktur layihələrdən biri - Oğuz-Qəbələ-Bakı su kəmərinin tikintisi layihəsinin maliyyələşdirilməsini, layihənin həyata keçirilməsinin başa çatmasına baxmayaraq, davam etdirəcək. Bu barədə fondun icraçı direktoru Şahmar Mövsümov birinci rübdəki fəaliyyətin yekunlarına həsr edilən mətbuat konfransında deyib.
Oğuz-Qəbələ-Bakı su kəməri ötən ilin dekabrında istismara verilib.
"İri layihələrdə keyfiyyət zəmanəti anlayışı var, yəni layihə çərçivəsində bütün işlər başa çatdıqdan və bütün nöqsanlar aradan qaldırıldıqdan sonra layihənin ümumi məbləğinin 5 faizinin ödənilməsi saxlanılır. Və bu zəmanətli hissəni biz 2011-ci il ərzində Neft Fondunun vəsaitlərindən ödəyəcəyik", - Mövsümov bildirib.
Bu işlərə 2011-ci ilin birinci rübündə artıq 2,3 milyon manat ayrılıb.
2007-ci ilin martında Oğuz rayonunun Sincan kəndində bu layihənin təməli qoyulub və tikinti işlərinə başlanıb. Uzunluğu 262 kilometrdən çox olan kəməri su ilə təmin etmək üçün çoxlu artezian quyusu qazılıb, yarımstansiya quraşdırılıb. Oğuz rayonu ərazisində dəniz səviyyəsindən 417 metr yüksəklikdə baş suqəbuledici qurğular kompleksi tikilmiş, eyni zamanda, suyun tənzimlənməsi üçün kəmər üzərində çoxsaylı nizamlayıcı qurğular inşa olunub.
Bu günədək paytaxt əhalisinin 40 faizi fasiləsiz, 60 faizi isə müəyyən cədvəl üzrə su ilə təmin olunurdu. Oğuz-Qəbələ-Bakı su kəməri istifadəyə verildikdən sonra əhalinin 75 faizə qədəri fasiləsiz, qalanları isə müəyyən cədvəl üzrə içməli su alacaqdır. Cədvələ uyğun su verilməsi müddəti 2 dəfəyə qədər artacaq.
Paytaxtda yeni su xətləri çəkiləcək, mövcud kiçik diametrli borular böyükləri ilə əvəz olunacaq və bununla da yaxın bir neçə ildə şəhərə cədvəl üzrə su verilməsi tamamilə aradan qaldırılacaqdır. Bakıətrafı yaşayış məntəqələrində isə bu problem yeni su təchizatı və kanalizasiya sisteminin yaradılması ilə həllini tapacaq.
Oğuz-Qəbələ-Bakı su kəmərinin sonuncu nöqtəsi olan və dəniz səviyyəsindən 190 metr yüksəklikdə yaradılan Abşeron qurğular kompleksi paytaxtın 17-ci kilometrliyində yerləşir. Burada kəmərin idarə olunması üçün bütün infrastruktur müasir səviyyədə qurulmuşdur. Layihə üzrə idarəetmə və nəzarətin beynəlxalq təcrübəyə uyğun reallaşdırılması üçün tender yolu ilə Almaniyanın "CES Consaulting Engineers Salzgitter" şirkəti seçilib.
Su kəmərinin layihələndirilməsi və tikintisi "Turan Xəzinədaroğlu İnşaat və Ticarət"-"Tekser İnşaat Sənaye və Ticarət"-"Gəncə körpü tikinti-2" hüquqi şəxslər birliyi tərəfindən həyata keçirilib.
"Azərsu" SC-nin məlumatına görə, Oğuz-Qəbələ-Bakı su kəmərinin tikintisinin ümumi dəyəri 480 milyon manat məbləğində qiymətləndirilir.
