Azərbaycan, Bakı, 20 aprel /Trend, müxbir A.Axundov/
Azərbaycanın sığorta şirkəti "Paşa Sığorta" 2011-ci ildə 14 milyon manat məbləğində sığorta mükafatları yığmağı planlaşdırır ki, bu da 2010-cu ilin göstəricisini 7,27 faiz üstələyəcək. Bu barədə çərşənbə günü Trend-ə şirkətin idarə heyətinin sədri Nofəl Rzayev məlumat verib.
Azərbaycanın Maliyyə Nazirliyi yanında Dövlət Sığorta Nəzarəti Xidmətinin məlumatına görə, 2010-cu ildə şirkətin yığımları 13,05 milyon manat, 2011-ci ilin birinci rübündə isə 1,95 milyon manat təşkil edib.
"Şirkətimizin yığımlar üzrə reytinqdə yeri bizim üçün vacib olsa da, prinsipial xarakter daşımır. Şirkətimiz üçün müştərilərə keyfiyyətli xidmətin göstərilməsi və mənfəətin əldə olunması prinsipialdır", - Rzayev bildirib.
"PAŞA Sığorta"nın təsisçisi olan "Paşa Holding" şirkətin nizamnamə kapitalını indiki 20 milyon manatdan 30 milyon manatadək artırmaq barədə qərar qəbul edib. Nizamnamə kapitalı 2010-cu ildə qazanılan gəlirlər, eləcə də səhmdarların əlavə vəsaitləri hesabına artırılacaq. İlin yekunları üzrə şirkətin xalis mənfəəti 2,806 milyon manat təşkil edib.
Kapitallaşma nəticəsində "PAŞA Sığorta"nın nizamnamə kapitalı Maliyyə Nazirliyinin 2011-ci il yanvarın 1-nə sığortaçıların kapitalının azı 3 milyon manat olması barədə tələbini on dəfə üstələyir.
"Paşa Sığorta" sığortanın 31 növü üzrə korporativ və fərdi müştərilərə xidmət göstərir.
2007-ci ildən "Paşa Sığorta" Böyük Britaniyanın "Moody International" agentliyi tərəfindən sığorta məhsullarının ISO 9001:2000 keyfiyyət idarəetmə standartlarına və xidmətlərinə uyğunluq səviyyəsinə görə sertifikatla təltif olunub. 2009-cu ildən etibarən "Paşa Sığorta" BMT-nin insan hüquqlarının, ətraf mühitin müdafiəsi və korrupsiyanın qarşısının alınması üzrə Qlobal Müqaviləsinin (UN Global Compact Initiative) iştirakçısıdır.
Aprelin 20-nə rəsmi məzənnə 0,7918 AZN/USD təşkil edir.
