Azərbaycan, Bakı, 21 aprel /Trend, müxbir N.İsmayılova/
Apreldə Azərbaycanda kənd təsərrüfatı məhsullarının qiymətlərində azalma müşahidə olunur. Bu barədə cümə axşamı Dövlət Statistika Komitəsinin rəhbəri Arif Vəliyev bildirib.
"Hazırda qiymətlərin səviyyəsində sabitlik müşahidə olunur, artıq onlar qalxmır, əksinə, müəyyən məhsulların qiymətlərində azalma qeydə alınır", - Vəliyev deyib.
Onun sözlərinə görə, proqnozlara uyğun olaraq, apreldə inflyasiya göstəriciləri yüksək olmayacaq.
"İlin əvvəlində bu göstərici 9,1 faiz təşkil edib və güman edirəm ki, bundan yuxarı olmayacq", - Vəliyev bildirib.
2011-ci ilin martında istehlak mallarının qiymətləri və xidmət tarifləri fevral ayı ilə müqayisədə 1,1 faiz, yanvar-fevralda isə 2010-cu ilin analoji dövrü ilə müqayisədə 9,1 faiz bahalaşıb.
Martda mal və xidmətlərin çıxılması ilə hesablanan mövsümi dəyişikliklərə uğrayan (meyvə və tərəvəz) istehlak qiymətlərinin bazis indeksi və dövlətin tənzimlədiyi qiymətlər ötən aylarla müqayisədə 0,1 faiz, 2010-cu ilin yanvar-martı ilə müqayisədə isə 6,2 faiz artıb.
Ərzaq mallarının qiymətləri martda 1,8 faiz artıb, qeyri-ərzaq məhsullarının qiymətləri 0,1 faiz azalıb, xidmət tarifləri isə 0,3 faiz artıb. 2010-cu ilin birinci rübü ilə müqayisədə, ərzaq malları 3,4 faiz, qeyri-ərzaq malları 2,8 faiz, xidmətlər isə 3,1 faiz bahalaşıb.