Azərbaycan, Bakı, 25 aprel /Trend, müxbir A.Axundov/
2011-ci ilin birinci rübündə Azərbaycan 104,212 milyon dollar məbləğində taxıl idxal edib ki, bu da ümumi idxalın 5,51 faizini təşkil edir və ötən ilin müvafiq dövründəki göstəricidən 2,36 dəfə çoxdur. Bu barədə Dövlət Gömrük Komitəsindən məlumat verilib.
Yanvar-martda un idxalı 62,76 dəfə - 11,046 milyon dollaradək artıb ki, bu da həmin dövr ərzində ölkə idxalının ümumi həcminin 0,58 faizini təşkil edib.
Hesabat dövründə 287,918 milyon dollar məbləğində (il ərzində artım 40,94 faiz) qida məhsulları idxal olunub ki, bu da ölkənin ümumi idxalının 15,22 faizini təşkil edib.
Birinci rübdə qida məhsullarından 37,174 milyon dollar məbləğində qənd (il ərzində azalma 2,56 faiz, idxalda ümumi pay - 1,97 faiz), 36 milyon dollarlıq yağ (il ərzində azalma 2,23 faiz, idxalda ümumi pay - 1,9 faiz), 4,71 milyon dollarlıq ət (artım 9,62 faiz, idxalda ümumi pay - 0,25 faiz), 1,837 milyon dollarlıq süd (artım 4,84 faiz, idxalda ümumi pay - 0,1 faiz) təşkil edib.
İlin ilk üç ayı ərzində Azərbaycan idxalının böyük hissəsi - 31,97 faizi maşınların, mexanizmlərin, avadanlıqların, elektrik cihazlarının və onların ehtiyat hissələrinin payına düşüb. Yanvar-martda 604,8 milyon dollar məbləğində maşın və avadanlıqlar idxal olunub ki, bu da ötən ilin müvafiq dövr göstəricisini 87,67 faiz ötür.
Həmçinin, ölkəyə 280,948 milyon dollar məbləğində (artım 97,03 faiz, idxalda ümumi payı - 14,85 faiz) nəqliyyat vasitələri və onların hissələri, 235,274 milyon dollar məbləğində qara metallar və ondan hazırlanan məmulatlar (artım 2,72 dəfə, idxalda ümumi payı - 12,44 faiz) və 54,229 milyon dollar məbləğində oduncaq və ondan hazırlanan məmulatlar (artım 66,6 faiz, idxalda ümumi payı - 2,87 faiz), 12,288 milyon dollarlıq xalq istehlakı malları (artım 38,21 faiz, idxalda ümumi payı - 0,65 faiz), 12,662 milyon dollarlıq mebel və onun hissələri (artım 22,69 faiz və ümumi idxalda payı - 0,67 faiz), 33,587 milyon dollarlıq əczaçılıq məhsulları (artım 50,64 faiz və ümumi idxalda payı - 1,78 faiz) gətirilib.
Yanvar-martda Azərbaycanın idxalı 1,892 milyard dollar təşkil edib ki, bu da 2010-cu ilin analoji dövrü ilə müqayisədə 63,1 faiz çoxdur.
İxrac əməliyyatları 5,445 milyard dollar təşkil edib ki, bu da 2010-cu ilin analoji dövrü ilə müqayisədə 23,97 faiz çoxdur.
Ölkədə mal dövriyyəsinin ümumi həcmi 7,336 milyard dollar təşkil edib. Bu, 2010-cu ilin analoji dövrü ilə müqayisədə 32,15 faiz çoxdur. Xarici ticarət əməliyyatları dünyanın 116 ölkəsi ilə aparılıb.
Xarici ticarət əməliyyatlarında 3,553 milyard dollar həcmində müsbət saldo yaranıb.
