Azərbaycan, Bakı, 27 aprel /Trend/
İranın Mərkəzi Bankı ölkənin 2010-cu ildə xarici borcunun 22 milyard 75 milyon dollar həcmində olduğunu bildirib. Bu rəqəm 2009-cu illə müqayisədə dəyişməyib. Bu barədə Trend İranın MEHR xəbər agentliyinə istinadən məlumat verir.
"The Economist" jurnalının 2009-cu il yanvar ayı üçün apardığı hesablamalara görə, İranın 2008-ci ildə xarici borcu 21 milyard 600 milyon dollar olub.
Jurnalın proqnozlarına görə, sonrakı illərdə İranın xarici borcunda azalma müşahidə olunacaqdı. 2009-cu ilin sonlarında İranın xarici borcunun 19 milyard 300 milyon, 2010-cu ildə isə 18 milyard 800 milyon dollara kimi azalacağı proqnozlaşdırılırdı. 2011-2012-ci illərdə İranın xarici borcunun 18 milyard 200 milyon dollara qədər azalacağı, 2013-cü ildə isə bu rəqəmin dəyişməyəcəyi gözlənilirdi.
MEHR agentliyinin məlumatında bildirilir ki, 22,075 milyard dollardan 10,627 milyad dollar qısamüddətli, 11,447 milyard dollar isə uzunmüddətli borcdur.
Mərkəzi Bankın məlumatına əsasən, həmçinin İranda likvidliyin həcmi 24,6 faiz artaraq 2009-cu ildəki 217 milyard dollardan 2010-cu ildə 270 milyard dollara çatıb. Likvidlik ölkədə inflyasiyaya səbəb olur. İranın Mərkəzi Bankınin rəisi Mahmud Bəhməninin bildirdiyinə görə, hazırda ölkədə inflyasiyanın səviyyəsi 12-14 faiz təşkil edir.
