Azərbaycan, Bakı, 28 aprel /Trend, müxbir N.İsmayılova/
Azərbaycanda ölkə iqtisadiyyatının inkişafında maneələrin aradan qaldırılması məqsədilə vergi qanunvericiliyinin monitorinqi aparılır. Bu barədə cümə axşamı Vergilər Nazirliyinin Vergi siyasəti və strateji araşdırmalar Baş İdarəsinin rəisi Akif Musayev Azərbaycandakı Amerika Ticarət Palatasının (AmCham) ölkədə vergiqoyma üzrə təşkil etdiyi ilk "Doğru yol axtarışında" konfransında deyib.
"Azərbaycanın vergi orqanları üzün müddətdir "AmCham"la əməkdaşlıq edir və bu sahədə müxtəlif məsələ və problemləri müzakirə edir. Bu müzakirələr ölkənin vergi siyasətinin formalaşdırılmasında mühüm rol oynayır və vergi sisteminin təkmilləşdirilməsinə və onun inkişafının yeni mərhələsinin formalaşdırılmasına yönəlib", - Musayev qeyd edib.
Onun sözlərinə görə, Azərbaycanın vergi sistemində çoxlu islahatlar aparılıb və indi də bu proses davam edir. MDB və Şərqi Avropa ölkələri arasında Azərbaycan vergiödəyicilərə yüksək xidmətin göstərilməsinin yüksək səviyyəsinə nail olub.
"Ölkə iqtisadiyyatı inkişaf edir və bu inkişafa uyğun yeni islahatlar aparmaq lazımdır. İndi Vergi Məcəlləsinə əlavə və dəyişikliklərə hazırlıq aparılır, lakin layihə hələ ki hazır deyil və yalnız müzakirə mərhələsindədir. Nazirliyə müxtəlif təkliflər daxil olur, lakin Vergi Məcəlləsinə köklü dəyişikliklər gözlənilmir", - o vurğulayıb.
Musayevin sözlərinə görə, innovasiyalı iqtisadiyyata keçidi stimullaşdırmaq məqsədilə vergi qanunvericiliyinin monitorinqinin aparılması və iqtisadiyyatın inkişafına mane olan əngəllərin aradan qaldırılması kifayət qədər uzun prosesdir.
"Dünya iqtisadi böhranı belə tədbirlərin görülməsinin zəruriliyini göstərib. Avropa ölkələrinin təcrübəsi göstərir ki, onlar ölkə iqtisadiyyatının inkişafını stimullaşdırmaq üçün lazımdır", - o vurğulayıb.
"AmCham"ın idarə heyətinin üzvü Alum Batinin sözlərinə görə, palatanın təkliflərinə vergiqoymanın azaldılması, qanunvericilikdə təkrarların aradan qaldırılması, statistik məlumatların hesablanması sisteminin tətbiqi və onlardan istifadə, maraqların toqquşmasından yayınma və biznes cəmiyyəti ilə sıx əməkdaşlıq aiddir.
Konfransın əsas məqsədi vergiqoyma sahəsində gələcək islahatların və onların ölkə iqtisadiyyatına mümkün təsirinin düzgün yollarının müəyyənləşdirilməsi, qeyri-neft sektorunun inkişafı və Azərbaycanın digər ölkələrlə müqayisədə rəqabətqabiliyyətli olmasıdır.
Azərbaycandakı ABŞ Ticarət Palatası (AmCham) ölkədə aparıcı biznes-assosiasiya olmaqla işgüzar əlaqələrin qurulması üçün yaxşı imkanlar təqdim edir. 1996-ci ildə təsis edilən "AmCham"a Azərbaycan iqtisadiyyatının bütün sektorlarında fəaliyyət göstərən 190-dan çox şirkət daxildir. Palata Azərbaycandakı bütün xarici investisiyaların 80 faizini, eləcə də daxili investisiyaların xeyli hissəsini təmsil edir.
