Azərbaycan, Bakı, 3 may /Trend, müxbir A.Axundov/
Azərbaycan İqtisadi İnkişaf Nazirliyi tərəfindən hazırlanan 2011-2025-ci illər üçün Azərbaycanın iqtisadi inkişafının uzunmüddətli strategiyası 2025-ci ildə işsizliyin səviyyəsini 2009-cu ildəki 6 faizdən 3 faizə azaldılmasını qarşıya məqsəd qoyur.
Bu müddət ərzində məşğulluq sahəsində həyata keçirilməsi planlaşdırılan tədbirlər arasında məşğulluğun və yüksək gəlirin təmini baxımından yüksək əlavə dəyəri olan sahələrin inkişafı, yeni imkanlardan effektiv istifadə, əmək bazarında rəqabətin artırılması, geniş əhali kütləsinin tam olmayan məşğuliyyətinin tam effektiv məşğuliyyətlə əvəzlənməsi və işçi qüvvəsinin bütün həyat boyunca təliminin davam etdirilməsi, işçilərin ayrı-seçkiliyinin yaranması hallarını istisna edən mühitin yaradılması təklif olunur.
Bundan başqa, müxtəlif iş yerləri və ixtisaslar arasında qabiliyyətin rotasiyası və inteqrasiyası yolu ilə mobilliyin təmini; demoqrafik dəyişikliklərə görə meydana çıxan çətinliklərin dəf edilməsi məqsədilə doğum sayı göstəricilərinin artırılmasına yönələn maddi stimulların verilməsi; qadın və gənclərin işçi qüvvə strukturunda iştirak səviyyəsinin yüksəldilməsi; əmək bazarının mütəmadi monitorinqlərinin keçirilməsi; əmək bazarı, məşğulluq, əməyin mühafizəsinin norma və standartları haqqında milli informasiya sisteminin yaradılması; əmək miqrasiyasının idarəetmə sisteminin təkmilləşdirilməsi; friksion işsizliyin yaranmasının azaldılması baxımından ixtisasın artırılması və ya təkrar ixtisaslaşma üzrə intensiv kursların təşkili planlaşdırılır.
