Azərbaycan, Bakı, 27 may /Trend, müxbir A.Axundov/
Azərbaycanın sığorta şirkəti "Bakı Sığorta" 2011-ci ildə beş milyon manata yaxın sığorta mükafatı toplamağı planlaşdırır. Bu barədə Trend-ə cümə axşamı şirkətin idarə heyəti sədrinin müavini Mehman Əliyev məlumat verib.
"Biz mükafatların əsas hissəsini ənənəvi növlər - avtomobillərin və əmlakın sığortası üzrə toplamağı planlaşdırırıq", - Əliyev bildirib.
Azərbaycanın Maliyyə Nazirliyi yanında Dövlət Sığorta Nəzarəti Xidmətinin məlumatına görə, 2010-cu ildə "Bakı Sığorta" şirkətinin yığımları 2,59 milyon manat, ödənişləri 1,18 milyon manat təşkil edib.
Yanvar-apreldə şirkət 1,71 milyon manat həcmində mükafat toplayıb, 0,27 milyon manat ödəniş həyata keçirib.
"Bakı Sığorta" ASC 28 avqust 2007-ci ildən Azərbaycanın sığorta bazarında fəaliyyət göstərir. Nəzarət paketi "Bank Respublika" ASC-yə məxsusdur. "Bakı Sığorta" bank tərəfindən nəzarət paketinin (səhmlərin 50 faizindən çoxu) "Tural Sığorta" şirkətindən alınması yolu ilə yaradılıb. Yenilənmiş şirkətin səhmlərinin yerdə qalan hissəsi digər fiziki şəxslər arasında bölüşdürülüb. Şirkətin nizamnamə kapitalı 4,377 milyon manata bərabərdir.
Sirkətin idarə heyətinin sədr müavininin sözlərinə görə, bu il şirkətin planlarına yeni xidmətlərin tətbiqi daxil deyil.
Şirkətin 24 növ sığorta xidmətinin göstərilməsinə lisenziyası var. Onların dördü icbaridir. Onların arasında ənənəvi əmlak sığortası, fərdi sığorta, məsuliyyət sığortası, kosmik, energetika risklərinin, ətraf mühitin çirkləndirilməsi sığortası və s. var.Baki Sığorta həm fiziki, həm də hüquqi şəxslərə xidmət göstərir.