Azərbaycan , Bakı , 27 may /Trend, müxbir N.İsmayılova /
Bu gün Bakıda keçirilən federasiya təsisçilərinin ilk toplantısı çərçivəsində Mərkəzi Avrasiya Banklar Federasiyasının tərkibinə iki yeni üzv qəbul edilib. Türkiyə və Tacikistan banklar assosiasiyaları banklar federasiyasının üzvləri olublar.
"Bundan əvvəl hər iki assosiasiya federasiyaya üzvlüyə daxil olmaq üçün sənəd vermişdi, lakin Azərbaycan qanunvericiliyinə görə, bu təşkilatlar hüquqi şəxs statusu daşımalı idilər, ona görə də qəbul edilmə prosesi uzandı", - Mərkəzi Avrasiya Banklar Federasiyasının prezidenti Eldar İsmayılov bildirib.
Onun sözlərinə görə, Belarus da müşahidəçi statusunda federasiyanın assosiativ üzvü olmaq istəyini ifadə edib. Bu ərizəyə baxıldıqdan sonra Belarus Banklar Assosiasiyasına federasiyaya üzv kimi daxil olmağı təklif etmək barədə qərar qəbul edilib.
"Bununla yanaşı, federasiyay üzvlük məsələsi ilə bağlı Rusiya Banklar Federasiyası ilə də danışıqlar aparılır, onlar gələcəkdə də davam etdiriləcək", - İsmayılov bildirib.
Azərbaycanın Ədliyyə Nazirliyi Mərkəzi Avrasiya Banklar Federasiyasını 2010-cu ilin avqustunda qeydiyyata alıb. Federasiyanını təsisçiləri Azərbaycan, Gürcüstan, Qırğızıstan və Ukrayna banklar assosiasiyalarıdır. Türkiyə və Tacikistanın banklar assosiasiyaları da federasiyanın üzvləridir.
Mərkəzi Avrasiya Banklar Federasiyasının mənzil-qərargahı Bakıda yerləşir. Federasiyaya Mərkəzi Avropa və Asiya ölkələrinin banklar assosiasiyaları daxildir. Onlar bank və pul-kredit siyasətini birgə işləyib hazırlayacaqlar.
