...

Azərbaycan-Pakistan lizinq şirkəti 2011-ci ildə portfelinin 5 dəfə artacağını proqnozlaşdırır

Biznes və iqtisadiyyat xəbərləri Materials 31 May 2011 16:35 (UTC +04:00)

Azərbaycan, Bakı, 31 may /Trend, müxbir A.Axundov/

Azərbaycan-Pakistan lizinq şirkəti "MCB Lizinq" 2011-ci ilin sonuna portfelinin həcmini 5,5 milyon manat səviyyəsində proqnozlaşdırır. Halbuki, ilin əvvəlinə bu göstərici 1,17 milyon manat olub. Bu barədə çərşənbə axşamı Trend-ə şirkətin idarə heyətinin sədri Ramal Cəfərov deyib.

"2011-ci il mayın 31-nə lizinq portfeli 2,378 milyon manat təşkil edib. 2011-ci ilin sonuna proqnoz 5,5 milyon manat, 2012-ci ilin sonuna isə 16-17 milyon manatdır", - Cəfərov qeyd edib.

Onun sözlərinə görə, bu günədək şirkətin satışının ümumi həcmi 2,1 milyon manat təşkil edib.

"İlin sonuna biz satış həcmini 7 milyon manata, 2012-ci ilin sonuna isə 21 milyon manata çatdırmağı planlaşdırırıq", - Cəfərov əlavə edib.

Cəfərovun sözlərinə görə, hazırda şirkətin müştərilərlə qüvvədə olan 45-ə yaxın müqaviləsi var.

"Bizi rəqabət qabiliyyətli və dövlətin böyük diqqət yetirdiyi, eləcə də Azərbaycanda inkişafına böyük tələbatın olduğu sahələr maraqlandırır. Bu, ilk növbədə, kənd təsərrüfatında emal sektoru, infrastruktur layihələr, neft sektoru üçün yardımçı olan sahələr və tibb sahəsidir. Biz artıq bu sahələrdə fəaliyyət göstəririk", - Cəfərov vurğulayıb.

Şirkət 13 iyul 2010-cu il tarixində fəaliyyətə başlamasını rəsmən elan edib. "MCB Lizinq" lizinq şirkəti ölkənin vergi orqanlarında 15 oktyabr 2009-cu il tarixində dövlət qeydiyyatdan keçib. Şirkətin nizamnamə kapitalı 1,5 milyon manat təşkil edir. "MCB Lizinq"in təsisçiləri iştirak payının 70 faizinə malik Pakistanın "MCB Bank LTD" şirkəti və Namiq Səfərovdur.

Pakistanın MCB bankının altı milyard dollardan çox aktivi, 1500 filialı var və dünyanın səkkiz ölkəsində təmsil olunub. O, əsas fəaliyyəti tekstil sənayesində və dünyanın aparıcı brendləri üçün məhsul istehsalında cəmləşən "Nishat Group" şirkətlər qrupuna daxildir.

Mayın 31-nə olan rəsmi məzənnə 0,7894 AZN/USD təşkil edir.

Xəbər lenti

Xəbər lenti