Azərbaycan, Bakı, 1 iyun /Trend, müxbir N.İsmayılova/
"AzeriCard" Prosessinq Mərkəzi xidmətlərin keyfiyyətinin yaxşılaşdırılması üzrə fəaliyyəti aktivləşdirib. Bu barədə çərşənbə günü "AzeriCard"ın biznesin inkişafı üzrə rəhbəri Cahangir Məmmədov deyib.
"Artıq "Cash by Code" kimi innovativ xidmət tətbiq edilib. Onun köməyi ilə plastik kart sahibləri nağd pul vəsaitlərini plastik kartdan istifadə etmədən bankomatlar vasitəsilə ala biləcəklər. Bundan başqa, mobil bankçılığın ilk versiyasının sınaqları davam edir", - Məmmədov qeyd edib.
Onun sözlərinə görə, yeni mobil bankçılıq sistemi təcrübi istismara yaxın ay yarım - iki ay ərzində verilə bilər.
Mobil bankinq xidməti sutka ərzində onlayn rejimdə hesab balansını yoxlamağa, hesab üzrə əməliyyatların hesabatlarını formalaşdırmağa, elektrik enerjisi, mobil və stasionar rabitəyə, internet xidmətlərinə görə ödənişləri etməyə, pul vəsaitlərini kartdan karta köçürməyə, elekton aviabiletin ödənişini etməyə və hər aparılan əməliyyat üçün (hesabdan vəsaitin çıxarılması və ya daxil olması) SMS-bildiriş almağa imkan verir. Mobil bankinqin yeni versiyası Azərbaycanın bütün mobil operatorlarının şəbəkəsində xidmət göstərməyə imkan verəcək.
Hazırda Azərbaycan Beynəlxalq Bankının 100 faizlik mülkiyyətində olan "AzeriCard" həm Azərbaycanda, həm də ondan kənarda 30 banka xidmət göstərir. Onnlardan 28-i beynəlxalq ödəniş sistemlərinin üzvləridir. Azərbaycanda 44 bank fəaliyyət göstərir.
