Azərbaycan, Bakı, 7 iyun /Trend, müxbir A.Axundov/
2011-ci ilin I rübü ərzində daxili valyuta bazarının ümumi həcmi ötən ilin analoji dövrü ilə müqayisədə 12,3 faiz artaraq 6,03 milyard manat təşkil edib (ötən ilin I rübündə bu göstərici 5,37 milyard manat olub). Bu barədə Azərbaycan Mərkəzi Bankının çərşənbə axşamı I rübün yekunları üzrə maliyyə sabitliyinə dair açıqladığı hesabatda deyilir.
Qeyri-mütəşəkkil valyuta bazarında həyata keçirilən əməliyyatların həcmi 10,4 faiz və ya 544,4 milyon manat artıb. O, daxili valyuta bazarının 95,6 faizini təşkil edib.
Hesabat dövrü ərzində qeyri-mütəşəkkil valyuta bazarının 78,2 faizi bankdaxili mübadilə əməliyyatlarının, qalan hissəsi açıq banklararası valyuta bazarının payına düşüb.
Mütəşəkkil banklararası valyuta bazarının (BEST) həcmi 1,8 dəfə (118,2 milyon manat) artaraq 263,9 milyon manata çatıb və daxili valyuta bazarının 4,4 faizini təşkil edib.
Hesabata əsasən, valyuta bazarında Mərkəzi Bank tərəfindən 156,6 milyon manat məbləğdə xalis alış həyata keçirilib.
I rübdə fiziki və hüquqi şəxslərin banklardan aldığı nağd xalis xarici valyutanın həcmi ötən ilin anoloji dövrü ilə müqayisədə 39 faiz artaraq 1,37 milyard manat təşkil edib.
İyunun 7-nə olan rəsmi məzənnə 0,7888 AZN/USD təşkil edir.
