Azərbaycan, Bakı, 8 iyun /Trend, müxbir A.Axundov/
Azərbaycanda sığorta müqaviləsi bağlanan zaman dəymiş ziyanın məbləğinin qiymətləndirilməsi və sığorta edilən obyektin dəyərinin müəyyənləşdirilməsi vahid standartlar üzrə aparılmalıdır. Bu barədə çərşənbə günü Azərbaycan Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov deyib.
"Sığorta bazarı qarşısında duran vəzifələrdən biri sığorta məhsulları istehlakçılarının hüquqlarının qorunmasıdır. Bunun üçün dəyən ziyanın məbləğinin düzgün qiymətləndirilməsi və sığorta edilən obyektin obyektiv müəyyənləşdirilməsidir", - Xəlilov çərşənbə günü Bakıda "Qiymətləndirmə fəaliyyətinin tənzimlənməsi. Müasir beynəlxalq təcrübə" beynəlxalq konfransı zamanı deyib.
Onun sözlərinə görə, sığortaçılar və peşəkar sertifikatlaşdırılmış qiymətləndiricilərin əməkdaşlığı zəruridir və böyük perspektivlərə malikdir.
"Bu gün əhali arasında qiymətləndirmə faəliyyətinin təbliğinə ehtiyac var. Bu işdə sığorta şirkətlərinin, bankların və Azərbaycan Qiymətləndiricilər Cəmiyyətinin fəal iştirakı ölkədə qiymətləndirmə fəaliyyətinin gələcək inkişafı üçün yaxşı şərait yaradacaq", - Xəlilov qeyd edib.
"Qiymətləndirmə fəaliyyətinin tənzimlənməsi. Müasir beynəlxalq təcrübə" konfransı Beynəlxalq Maliyyə Korporasiyası (IFC) və Azərbaycan Qiymətləndiricilər Cəmiyyəti tərəfindən təşkil edilib.
Konfransda çıxış edən Milli Məclisin deputatı Vahid Əhmədovun sözlərinə görə, sığortada qiymətləndirmənin başlıca problemi müstəqil qiymətləndirmənin olmamasıdır.
"Sığorta halı yaranan zaman sığorta şirkətləri dəymiş ziyanın həcmini özləri qiymətləndirirlər və bəzən bu qiymətləndirmə reallıqdan aşağı olur", - Əhmədov bildirib.
Bundan əvvəl parlamentin İqtisadi siyasət komitəsinin sədri Ziyad Səmədzadənin Trend-ə dediyinə görə, iyunun sonunda üçüncü oxunuşda müzakirəsi gözlənilən "Sığortanın icbari növləri haqqında" qanun layihəsində daşınmaz əmlak qiymətləndiricilərinə qarşı tələblərin sərtləşdirilməsi təklif edilir.
"Qanun layihəsində, xüsusilə də daşınmaz əmlak maddəsi üzrə ciddi dəyişikliklər gözlənilir. Mühüm məsələ sığortaya verilən əmlakın real ekspert qiymətləndirməsidir", - Səmədzadə bildirib.
Onun sözlərinə görə, Azərbaycanda müasir qiymətləndiricilər və bu sahədə müvafiq təcrübə yoxdur.
"Dünyada əmlakın qiymətləndirilməsi üzrə müasir metodologiya, müvafiq normativlər var. Onlar qiymətləndirilən zaman 2-3 faizlik yanlışlıq yarana bilər. Azərbaycanda isə bir bina bir neçə ekspert tərəfindən qiymətləndirilə bilər, onların qiymətləndirmələri isə bir-birindən çox fərqlənir", - Səmədzadə qeyd edib.
Səmədzadənin sözlərinə görə, buna görə də "Sığortanın icbari növləri haqqında" qanun layihəsində qiymətləndiricilərə qarşı sərt tələblər irəli sürüləcək. Onlardan biri qiymətləndirmə fəaliyyətini həyata keçirmək üçün sertifikatın alınması olacaq.
"Sertifikatları Əmlak Məsələləri Dövlət Komitəsi, yaxud özəl şirkətlər verəcək. Xaricdə bununla özəl şirkətlər məşğul olur", - Səmədzadə əlavə edib.
"Sığortanın icbari növləri haqqında" qanun layihəsi ikinci oxunuşda qəbul edilib və indi təkliflər nəzərə alınmaqla xüsusi komissiya tərəfindən tamamlanır.
