...

Azərbaycan iqtisadiyyatına yatırılan xarici investisiyalar il ərzində 21 faiz artıb

Biznes və iqtisadiyyat xəbərləri Materials 16 İyun 2011 19:05 (UTC +04:00)

Azərbaycan, Bakı, 16 iyun /Trend, müxbir N.İsmayılova/

2011-ci ilin yanvar-mayında Azərbaycan iqtisadiyyatına qoyulan xarici investisiyaların ümumi həcmi 821,6 milyon manat təşkil edib. Bu, ötən ilin analoji dövrü ilə müqayisədə 20,7 faiz çoxdur. Bu barədə Trend-ə Dövlət Statistika Komitəsindən bildiriblər.

Yanvar-apreldə Azərbaycan iqtisadiyyatına xarici ölkə və beynəlxalq təşkilatlar tərəfindən yatırılan investisiyaların 92,1 faizi (756,8 milyon manat) Böyük Britaniya, ABŞ, Yaponiya, Norveç, Türkiyə, Fransa, Çexiya və Koreya investorlarının payına düşür.

Əvvəllər olduğu kimi, Böyük Britaniya Azərbaycana yatırılan investisiyaların həcminə görə liderliyini qoruyub. Onun xarici sərmayələrin həcmində xüsusi çəkisi 48,4 faiz təşkil edib. Britaniya investisiyaları 397,2 milyon manat olub

ABŞ investisiyaları 135,7 milyon manat (xüsusi çəkidə 16,5 faiz), Yaponiya - 82,2 milyon manat (10 faiz), Fransa - 21,1 milyon manat (2,6 faiz), Norveç - 46,3 milyon manat (5,6 faiz), Çexiya - 25,4 milyon manat (3,1 faiz), Türkiyə - 39,5 milyon manat (4,8 faiz), Koreya - 9,3 milyon manat (1,1 faiz), İsveçrə - 3,2 milyon manat (0,4 faiz), Səudiyyə Ərəbistanı - 2,4 milyon manat (0,3 faiz), İtaliya - 237,6 min manat, Lüksemburq - 60,3 min manat təşkil edib.

Beynəlxalq maliyyə institutlarından ən böyük investisiya həcmi Dünya Bankı tərəfindən (4,6 faiz xüsusi çəki ilə 37,4 milyon manat) yatırılıb.

Asiya İnkişaf Bankı Azərbaycanda layihələrin həyata keçirilməsinə 20,04 milyon manat (2,4 faiz), İslam İnkişaf Bankı isə 1,4 milyon manat (0,2 faiz) yönəldib.

İyunun 16-na olan rəsmi məzənnə 0,7879 AZN/USD təşkil edir.

Xəbər lenti

Xəbər lenti