Azərbaycan, Bakı, 22 iyun /Trend, müxbir A.Axundov/
Azərbaycanda 499 mehmanxana və mehmanxana tipli obyekt fəaliyyət göstərir ki, fəaliyyətin bu növü üzrə 310 mehmanxana lisenziya alıb. Bu barədə çərşənbə günü Trend-ə nazirliyin Daxili turizmin inkişafı sektorunun baş məsləhətçisi Vüqar Şixəmmədov bildirib.
"Mədəniyyət və Turizm Nazirliyi müntəzəm olaraq lisenziyası olmayan obyektlərə xəbərdarlıq edir. Belə obyektlərin fəaliyyət göstərməsi qanunvericiliyə ziddir və nazirlik müntəzəm şəkildə onlarla bununla əlaqədar iş aparır", - Şixəmmədov deyib.
Onun sözlərinə görə, nazirliyin saytında və KİV-də lisenziyasız işləyən obyektlərin siyahısı müntəzəm şəkildə dərc olunur, yerli və xarici turistlərə həmin obyektlərə getməmək tövsiyə edilir.
Bir müddət əvvəl nazirliyin Tədqiqat işləri, statistika və lisenziyalaşıdrma sektorunun müdiri Rəhman Oruclunun dediyi kimi, son vaxtlar mehmanxana və mehmanxana tipli obyektlərin lisenziyalaşdırılmaya cəlb edilmə faizi kəskin şəkildə artıb.
"Obyektlərin lisenziyalaşdırılması üçün Mədəniyyət və Turizm Nazirliyinə müəyyən sənədlər təqdim edilməlidir. Təəssüf ki, bəzi mehmanxana və mehmanxana tipli obyektlərin sahibləri tikinti işləri aparan zaman səhvə yol verirlər. Nəticədə obyektin tikilməsinə baxmayaraq, bu səhvlər səbəbindən onlar müəyyən sənədləri ala bilmirlər. Təbii ki, qanunvericiliyə əsasən, onlardan lazımi sənədlər almadan lisenziya verə bilmərik", - Oruclu qeyd edib.
Onun sözlərinə görə, bundan sonra nazirlik bu məsələdə ciddi tədbirlər görəcək.
"Rəhbərliyin prinsipial mövqeyi ondan ibarətdir ki, qanunsuz fəaliyyət göstərən mehmanxanaların işi dayandırılmalıdır. Belə mehmanxanaların çoxu Bakıdan kənarda yerləşir", - Oruclu vurğulayıb.
Mehmanxana və mehmanxana tipli obyektlərin fəaliyyətinə lisenziya 5 il müddətinə 1500 manat dövlət rüsumunu ödəmək şərti ilə verilir. Turizm fəaliyyəti üçün lisenziya isə 5 il müddətinə 5500 manat dövlət rüsumu ödənilməklə verilir.
İyunun 22-nə olan rəsmi məzənnə 0,7873 AZN/USD təşkil edir.