...

Azərbaycan Beynəlxalq Sığorta Forumunun büdcəsinə düzəlişlər edilib

Biznes və iqtisadiyyat xəbərləri Materials 23 İyun 2011 19:42 (UTC +04:00)

Azərbaycan, Bakı, 23 iyun /Trend, müxbir A.Axundov/

Azərbaycan Sığortaçılar Assosiasiyası (ASA) cümə axşamı Müşahidə Şurasının iclasında iyulun 7-8-də Bakıda keçiriləcək II Beynəlxalq Sığorta Forumunun büdcəsini müzakirə edib və orada düzəlişlər aparıb.

"İclas zamanı Foruma hazırlıqla bağlı görülən işlər üzrə hesabat dinlənilib, onun büdcəsi müzakirə edilib və dəyişdirilib", - bu barədə Trend-ə iclasdan sonra ASA-nın icraçı direktoru Azər Əliyev məlumat verib.

Əliyevin sözlərinə görə, düzəlişlər iştirakçıların sayının artması və digər səbəblərlə bağlıdır.

"Forumda iştirak etmək üçün artıq 90 iştirakçı qeydiyyata alınıb. Forumda Türkiyə, Rumıniya, Rusiya, İngiltərə, Ukrayna, Qazaxıstan, Yunanıstan və digər ölkələrdən 50-yə yaxın şirkət iştirak edəcək", - Əliyev bildirib.

İştirakçıların tam siyahısı ilə http://www.aiif.az/?p=8 elektron ünvanında tanış olmaq olar.

İyulun 7-8-də Bakıda II Beynəlxalq Sığorta Forumu keçiriləcək. Forumun təşkilatçısı Maliyyə Nazirliyinin dəstəyi ilə Azərbaycan Sığortaçılar Assosiasiyasıdır.

"Azərbaycanın sığorta bazarının inkişaf perspektivləri" mövzusunda Forumun keçirilməsində məqsəd ölkənin sığorta bazarında baş verən dəyişikliklər və beynəlxalq sığorta xidmətləri bazarına inteqrasiya prosesinin inkişafı haqqında məlumat verməkdir. İkinci dəfə keçiriləcək Beynəlxalq Forumda təcrübə mübadiləsinin aparılması, sığortaçılar arasında işgüzar görüşlərin təşkili və tərəfdaşlıq münasibətlərinin genişləndirilməsidir.

II Azərbaycan Beynəlxalq Sığorta Forumunun əsas mövzuları bunlardır: "İcbari sığorta", "Həyat sığortası" və "Banklar və onların sığorta bazarı ilə münasibətləri".

Forumun işində Azərbaycan sığorta şirkətlərinin rəhbərləri ilə yanaşı, aparıcı beynəlxalq sığorta və təkrar sığorta şirkətləri rəhbərlərinin iştirakı da nəzərdə tutulur.

Foruma "AzRE" Təkrarsığorta Şirkəti və Beynəlxalq Sığorta Şirkəti baş sponsorluq, eləcə də "Qarant Sığorta" , "Atəşgah Sığorta" , "AXA MBASK", "Standard Insurance", "Azal Sığorta", "A Group Insurance Company", "Azərsığorta", "Başak İnam Sığorta" və "Azərbaycan Sənaye Sığorta" şirkətləri sponsorluq edirlər. "UNITRE", "Nexum Technologies" şirkətləri Forumun xarici tərəfdaşlarıdır. "Synergy Partnership", "Media XPrimm", Rumıniyanın PR şirkəti, www.abc.az və www.gun.az portalları Foruma informasiya dəstəyi, "RAN Tour" turizm şirkəti isə təşkilati dəstək verir.

Hazırda Azərbaycanda 28 sığorta və bir təkrar sığorta şirkəti fəaliyyət göstərir.

Xəbər lenti

Xəbər lenti