Azərbaycan, Bakı, 29 iyun /Trend, müxbir İ.Xəlilova/
İslam İnkişaf Bankı (İİB) Azərbaycanda su təchizatı və kanalizasiya sistemlərinin təkmilləşdirilməsi üzrə iri layihənin maliyyələşdirilməsinə hazırdır.
2011-2013-cü illər üzrə yeni əməkdaşlıq proqramına su təchizatı və kanalizasiya üzrə iki layihə daxil edilib, onlardan hər birinə bank tərəfindən təxminən 110 milyon dollar vəsait ayrılması nəzərdə tutulur. Bu barədə Trend-ə ölkə hökumətindən məlumat verilib.
Həmin iki layihənin bir iri layihədə birləşdirilməsi ilə əlaqədar hazırda texniki-iqtisadi əsaslandırma (TİƏ) hazırlanır.
"Layihənin TİƏ-nin yekun variantı ilə tanış olmaq üçün iyulun ikinci yarısında İİB missiyasının Bakıya səfəri gözlənilir", - çərşənbə günü bankın Bakı ofisindən məlumat verilib. Bank ekspertlərinin sonuncu səfəri mayda olmuşdu.
Layihə Astara, Daşkəsən, Tərtər, Gədəbəy, Samux və Qazax rayonlarını əhatə edir. Su layihəsi üzrə kreditin 2011-ci ildə bəyəniləcəyi gözlənilir.
Azərbaycan 1992-ci ildən İslam İnkişaf Bankının üzvüdür və bu günə İİB-nin ölkə iqtisadiyyatının müxtəlif sahələri üzrə portfeli 700 milyon dollara çatır. Bank Azərbaycanda layihələrin maliyyələşdirilməsinə yanaşmasını dəyişərək bir layihə üçün verilən kreditin maksimal məbləğini təxminən beş dəfə artırıb. Əgər əvvəllər bir layihə üçün maliyyələşdirmənin limiti İİB tərəfindən 30-40 milyon dollar arasında müəyyən edilirdisə, indi bank bir layihə üçün 150 milyon dollaradək ayıra bilər.
Limitin artırılması sayəsində yeni əməkdaşlıq strategiyasının hazırlanması çərçivəsində ilk dəfə olaraq layihələrin böyüdülməsi - bir neçə layihənin birləşdirilməsi təklif olunmuşdu.
Yeni əməkdaşlıq proqramının dəyəri 1,4 milyard dollardır.
Bankın kapitalında ölkənin iştirak payı 0,13 faiz təşkil edir.
İslam İnkişaf Bankı 1975-ci ildə təsis edilib. Yarandığı vaxtdan bankın kapitalı on beş dəfə artaraq, iki milyard İslam dinarından 30 milyard İslam dinarına (İslam dinarı İİB-nin hesab vahididir və Beynəlxalq Valyuta Fondunun bir xüsusi kredit hüququna ekvivalentdir) çatıb.