Azərbaycan, Bakı, 4 iyul /Trend, müxbir A.Axundov/
2011-ci ildə Azərbaycanda əkin sahəsi 5,8 faiz, yaxud 21,643 min hektar artıb.
"İyunun 22-nə olan məlumata əsasən, Azərbaycanda yaz əkini 397,297 min hektar sahədə həyata keçirilib", - ölkənin Kənd Təsərrüfatı Nazirliyinin məlumatında deyilir.
İyunun 22-nə 42 828hektar sahədə (il ərzində artım 40,6 faiz) pambıq, 33 195 hektar sahədə (2,2 faiz) bostan bitkiləri, 83 224 hektar sahədə (6,4 faiz) çoxillik otlar, 4 608 hektar sahədə (51 faiz) birillik otlar, 1 435 hektar sahədə (6,2 faiz) tütün əkilib.
Hesabat dövründə şəkər çuğundurunun əkin sahəsinin 15 faiz (7315 hektar əkilib), kartof - 1,4 faiz (65 145 hektar), tərəvəz - 0,4 faiz (33 195 hektar), yeməli meyvəköklülərin isə 11,1 faiz (168 hektar) azaldığı müşahidə olunub.
Göstərilən müddətdə ümumilikdə 29,659 min hektar ərazidə dənli və paxlalı bitkilər (qarğıdalı istisna olmaqla) əkilib ki, 2010-cu ilin analoji dövründə bu rəqəm 31,242 min hektar təşkil edib. Azalma 5,1 faiz təşkil edib.
Vələmir 1 745 hektar (artım 5,8 faiz), qabıqdan təmizlənməmiş düyü - 1659 hektar, qarğıdalı - 34 262 hektar (artım 12,2 faiz), günəbaxan - 10 823 hektar (artım 21,5 dəfə) ərazidə əkilib.
İl ərzində ölkədə buğdanın əkin sahəsi 51,4 faiz azalıb.
"2011-ci il iyunun 22-dək 268 hektar sahədə buğda əkilib. Halbuki ötən il bu rəqəm 551 hektar idi", - nazirlikdən deyiblər.
Bir müddət əvvəl kənd təsərrüfatı naziri İsmət Abasovun dediyi kimi, 2011-ci ildə Azərbaycanda kənd təsərrüfatı məhsulları istehsalının ötən illə müqayisədə 6 faiz artacağı gözlənilir.
"Hava şəraiti əlverişli olsa, 6 faizdən çox kənd təsərrüfatı məhsulu istehsal edə bilərik", - Abasov qeyd edib. Onun sözlərinə görə, kənd təsərrüfatı məhsullarının bütün əsas növləri üzrə istehsalın artımı gözlənilir.
"Vəzifəmiz əhalinin kənd təsərrüfatı məhsullarına olan tələbatının yerli istehsal hesabına ödənilməsidir. Bu vəzifə yaxın bir neçə ildə həll ediləcək. Azərbaycanda heç bir kənd təsərrüfatı məhsulunun qıtlığı yoxdur", - Abasov qeyd edib.
2010-cu ildə istehsal olunan kənd təsərrüfatı məhsullarının ümumi həcmi faktiki qiymətlərlə 3,88 milyard manat təşkil edib.
Ötən ilin analoji dövrü ilə müqayisədə 2011-ci ilin yanvar-mayında Azərbaycanda kənd təsərrüfatı məhsullarının istehsalı 5,3 faiz, o cümlədən bitkiçilik 5,7 faiz, heyvandarlıq 5,3 faiz artıb.
Yanvar-mayda istehsal edilən kənd təsərrüfatı məhsullarının ümumi həcmi faktiki qiymətlərlə 940,9 milyon manat təşkil edib.