Azərbaycan, Bakı, 6 iyul /Trend, müxbir A.Axundov/
İqtisadi İnkişaf Nazirliyi Azərbaycanın xaricdə ticarət evlərinin yaradılması üzrə təkliflər hazırlayacaq. Bu barədə Trend-ə çərşənbə axşamı iqtisadi inkişaf naziri Şahin Mustafayev məlumat verib.
"Bununla bağlı Prezident İlham Əliyevin tapşırığı var, indi biz ticarət evlərinin yaradılması üzrə təkliflər hazırlayırıq", - Mustafayev deyib.
Bir müddət əvvəl nazir bildirmişdi ki, yerli istehsal mallarının ixracının irəliləməsi məqsədilə bəzi Aİ və MDB ölkələrinin paytaxtlarında ticarət evlərinin açılması planlaşdırılır.
"Bu istiqamətdə bizim üçün nisbətən cəlbedici olan müxtəlif ölkələrdə Azərbaycanın ticarət evlərinin yaradılması məsələsi üzrə tədqiqat aparılır. Bu həm MDB, həm də Aİ ölkələrinin bazarları ola bilər. Biz öz məhsullarımızın bu bazarlara ixracı üçün yer almaq fikrindəyik", - Mustafayev deyib.
Onun sözlərinə görə, yaxın gələcəkdə yaradılacaq ticarət evləri daimi əsasda fəaliyyət göstərəcək və həm özəl ticarətin, həm də sərgilərin təşviqi üçün nəzərdə tutulub.
