Azərbaycan, Bakı, 14 iyul /Trend, müxbir N.İsmayılova/
İlin birinci yarısında Azərbaycan İqtisadi İnkişaf Nazirliyi yanında Sahibkarlığa Kömək Milli Fonduna (SKMF) əvvəllər ayrılan kreditlərdən 41 milyon manat həcmində vəsait qaytarılıb. Trend-in məlumatına görə, bu barədə cümə axşamı Fondun icraçı direktoru Şirzad Abdullayev bildirib.
"Bu gün Fondun verdiyi kreditlərin qaytarılması ilə bağlı problem müşahidə olunmur. 2011-ci ildə güzəştli maliyyələşdirməyə 125 milyon manat vəsaitin yönəldilməsi planlaşdırılır ki, bunun 34 milyon manatı dövlət büdcəsindən, 91 milyon manatı əvvəllər verilən kreditlərin qaytarılması hesabına veriləcək", - Abdullayev deyib.
2011-ci ildə SKMF 74,3 milyon manat məbləğində 895 kreit verib. Bu vəsaitlər dəyəri 63,6 milyon manat olan 48 iri, 10,7 milyon manat məbləğində 847 kiçik layihənin həyata keçirilməsinə yönəldilib. Bununla yanaşı, Bakı qəsəbələrindən olan sahibkarlar 18 milyon manatlıq kredit alıblar.
2010-cu il ərzində SKMF 115 milyon manat məbləğində 1430 layihəni maliyyələşdirib.
2009-cu ildə SKMF səlahiyyətli kredit təşkilatları vasitəsilə 130 milyon manat məbləğində 2100-dən çox kredit verib. Beləliklə, 2009-cu ildə 2008-ci illə müqayisədə SKMF-nin vəsaitləri hesabına güzəştli kreditlər alan sahibkarların sayı 2,6 dəfə, kreditlərin həcmi isə 48 faiz artıb.
SKMF 1992-ci ildə yaradılıb. Sahibkarlara kreditlərin verilməsi səlahiyyətli banklar və bank olmayan kredit təşkilatları vasitəsilə həyata keçirilir.
İyulun 14-nə olan rəsmi məzənnə 0,7865 AZN/USD təşkil edir.
