Azərbaycan, Bakı, 14 iyul /Trend, müxbir N.İsmayılova/
2011-ci ilin yanvar-iyun aylarında Azərbaycanın ümumi daxili məhsulu (ÜDM) ötən ilin analoji dövr göstəricisi ilə müqayisədə 0,9 faiz artıb. Bu barədə cümə günü Trend-ə Dövlət Statistika Komitəsindən bildiriblər.
Cari qiymətlərlə ÜDM göstəricisi 22,5 milyard manat təşkil edib. Adambaşına düşən ÜDM-in həcmi 2496,9 manat (3149,5 dollar) olub.
Qeyri-neft sektorunun payı il ərzində 5,1 faiz artıb, neft-qaz sektoru 5,1 faiz azalıb.
İllik hesablamada nominal ÜDM 13,47 faiz artıb.
İqtisadiyyatın bütün sahələrində məhsul istehsalının ümumi həcmi 2,4 faiz azalaraq ÜDM-in 66,2 faizini təşkil edib ki, bunun da əsas hissəsi - 54,7 faizi (12,3 milyard manat) sənayenin payına düşür. Xidmət sahəsində əlavə dəyər istehsalı ötən ilin analoji dövrü ilə müqayisədə 7,1 faiz artıb və ÜDM-in 27,9 faizini təşkil edib.
Yanvar-iyunda kənd təsərrüfatı, ov sektoru və meşəçilikdə 1044,6 milyon manat əlavə dəyər istehsal olunub ki, bu ÜDM-in 4,6 faizini təşkil edir. Bu rəqəmlər tikinti sektorunda 1545,5 milyon manat (6,9 faiz), nəqliyyat və anbar təsərrüfatında 1395,7 milyon manat (6,2 faiz), rabitə və poçt xidmətlərində 378,8 milyon manat (1,7 faiz), sosial və digər xidmətlərin göstərilməsində 2557,8 milyard manatdır (11,4 faiz).
İyulun 14-nə olan rəsmi məzənnə 0,7865 AZN/USD təşkil edir.