Azərbaycan, Bakı, 2 avqust /Trend, müxbir A.Bədəlova/
2011-ci ilin sonuna bank olmayan kredit təşkilatı "FINCA Azerbaijan" kredit portfelini 111-112 milyon dollaradək, müştərilərin sayını isə 120-121 minədək artırmağı planlaşdırır. Bu barədə Trend-ə çərşənbə axşamı "FINCA Azerbaijan"ın baş icraçı direktoru Maniş Sane deyib.
"FINCA Azerbaijan"ın müştərilərinin sayı 2011-ci ilin 7 ayı ərzində 17 min artaraq 114 minə çatıb. Bu göstərici 2010-cu ilin sonunda 97 min nəfər olub", - Sane bildirib.
2010-cu ilin sonundan indiyədək təşkilatın kredit portfeli də xeyli - 83 milyon dollardan 101 milyon dollaradək artıb.
Sanenin sözlərinə görə, "FINCA Azerbaijan" sosial investorlar (BlueOrchard, Triodos Bank), eləcə də Beynəlxalq Maliyyə Korporasiyası, Avropa Yenidənqurma və İnkişaf Bankı ilə əməkdaşlığı davam etdirir.
Ötən həftə Azərbaycan İqtisadi İnkişaf Nazirliyində "FINCA Azerbaijan"ın bank olmayan kredit təşkilatı "Avrasiya-Kredit" ilə 1,42 milyon məbləğində imzalanan qrant sazişi rəsmən qeydə alınıb. Bu vəsaitlər hesabına müharibə və ya mina partlaması nəticəsində xəsarət alan aşağı gəlirə malik şəxslərə kiçik kreditlərin verilməsi nəzərdə tutulur.
Bu, "FINCA Azerbaijan"ın fəaliyyəti dövründə təşkilatın ayırdığı ilk qrantdır.
"FINCA Azerbaijan" ölkənin aparıcı bank olmayan kredit təşkilatlarından biri olmaqla, 1998-ci ildə ABŞ-ın Beynəlxalq İnkişaf Agentliyinin (USAİD) dəstəyi ilə yaradılıb. O, dünyanın 22 ölkəsində fəaliyyət göstərən "FINCA International"ın mikromaliyyə strukturudur.
