Azərbaycan, Bakı, 6 avqust /Trend, müxbir İ.Xəlilova/
Dünya Bankı (DB) ölkənin Mərkəzi Bankı yanında fəaliyyət göstərən Azərbaycan İpoteka Fonduna texniki yardımın göstərilməsi ilə bağlı araşdırmaların nəticələrini təhlil edir. Bu barədə DB-nin ölkədəki nümayəndəliyinin rəhbəri Cozef Ouen jurnalistlərlə görüşdə deyib.
"Əməkdaşlığın ümumi çərçivələri müəyyənləşdirildikdən sonra bank tərəfindən İpoteka Fonduna yardım göstərilməsi mümkündür. Fondun maliyyə dəstəyinə olan ehtiyacı əsasında yardımın forması ya kredit, ya da texniki yardım şəklində müəyyənləşəcək", - nümayəndəlik rəhbəri bildirib.
Onun sözlərinə görə, texniki təhlilin aparılması müddəti altı aydan 1 ilədək olacaq.
İyulda AİF ilə əməkdaşlıq imkanlarının dəqiqləşdirilməsi üçün DB Bakı ilk missiyasını göndərib. DB-nin əvvəlki missiyalarının səfəri zamanı AİF ilə əməkdaşlıq məsələlərinə toxunulub, lakin bu dəfəki missiya ilk dəfə olaraq məhz bu məqsədlər və bu məsələnin daha dərindən öyrənilməsi üçün göndərilib.
Beynəlxalq Maliyyə Korporasiyası (BMK) artıq Azərbaycan hökumətinə ipoteka kreditləşməsi sahəsində qanunvericiliyin təkmilləşdirilməsindəxüsusilə "İpoteka haqqında" qanunda əmlakın satılması prosesində , yardım göstərib.
İpoteka bazarının inkişafı üçün ipoteka predmetinin satılması sahəsində düzgün və səmərəli qanunvericiliyin olması çox vacibdir.
"Bu sahədə ən güclü qanunvericiliyə malik ölkələr bir tərəfdən ipoteka predmetlərinin kreditaalanın defoltu nəticəsində itkinin ödənilməsi məqsədilə satılmasını, digər tərəfdən ehtiay yarnadıqda kredit alanın əmlakının özgəninkiləşdirilməsini təmin edirlər", - bundan əvvəl BMK-nın layihəsinin rəhbəri Viktor Mints deyib.
Azərbaycanda ipoteka bazarının inkişafı layihəsi ölkədə ilkin ipoteka bazarının inkişafı məqsədilə 2005-ci ildən həyata keçirilir. Layihə 3 əsas komponetdən - ipoteka kreditləşməsi sahəsində qanunvericiliyin təkmilləşdirilməsi, ipoteka kreditləşməsi sahəsində institusional imkanların yaardılması, bu sahədə maarifləndirmənin artırılması komponentlərindən ibarətdir.
AİF indiyədək texniki yardım alıb, lakin fondun kredit reytiniq alması onun xarici borclar cəlb etmək imkanını artırır.
Ötən ilin sonunda "Fitch Ratings" Beynəlxalq Reytinq Agentliyi Azərbaycan İpoteka Fondunun (AİF) yerli və xarici valyutada uzunmüddətli öhdəliklər üzrə verilmiş stabil proqnozlu BB+ kredit reytinqi BBB- səviyyəsinədək artırıb.
Azərbaycanın yerli və xarici valyutada uzunmüddətli öhdəliklər üzrə verilmiş stabil proqnozlu BB+ kredit reytinqi BBB- səviyyəsinə "stabil" proqnozla artırılıb.
"AİF-in kredit reytinqini alması Azərbaycanın ölkə reytinqinə bərabərləşdirilib ki, bu da ilk növbədə Fondun dayanıqlı maliyyə vəziyyətinə, sağlam kredit portfelinə, yüksək ödəniş qabiliyyətinə və əhalinin yaşayış şəraitinin yaxşılaşdırılması ilə bağlı dövlətin sosial siyasətində əhəmiyyətli rola malik olmasının göstəricisidir", - məlumatda deyilir.
Yeni kredit reytinqinin alınması ipoteka kreditləri sisteminə davamlı dövlət dəstəyinin göstərilməsi, Fondda aktiv-passivlərin və risklərin idarə olunması sahəsində təkmil sistemin formalaşdırılması, effektiv hesabatlılıq sisteminin qurulması nəticəsində mümkün olub.
AİF-ə investisiya dərəcəli beynəlxalq kredit reytinqinin verilməsi gələcəkdə Fondun borclanma qabiliyyətinin daha da artırılmasına, Fondun beynəlxalq kapital bazarlarına çıxışına və bu bazarlarda sərfəli faiz dərəcələri ilə borc qiymətli kağızlarını yerləşdirməsinə zəmin yaradır. Bu da öz növbəsində növbəti illərdə də ölkədə ipoteka kreditləşməsinin davamlılığının və fasiləsizliyinin təmin edilməsinə, ipoteka kreditləşməsinin daha da genişləndirilməsinə əlverişli şərait yaradır.
Hazrda fondun xətti ilə müvəkkil banklar tərəfindən 300 milyon manatdan çox kredit verilib.
Azərbaycan İpoteka Fondu 2005-ci ilin sentyabrında Azərbaycan Prezidentinin fərmanı ilə dövlət təşkilatı qismində yaradılıb. Onun nizamnaməsi Prezidentin ayrıca fərmanı ilə 2005-ci ilin dekabrında təsdiq edilib. AİF-in əsas məqsədi Azərbaycan vətəndaşlarının uzunmüddətli maliyyələşdirmə vasitəsilə mənzillərlə təmin edilməsi üçün maliyyələşmə mexanizmlərinin yaradılmasından, eləcə də ipoteka kreditləşməsinə daxili və xarici investisiyaların cəlb edilməsindən ibarətdir.
