Azərbaycan, Bakı, 24 avqust /Trend, müxbir E.İsmayılov/
Yaxın vaxtlarda Bakıda Ziya Bünyadov prospektinin yenidən qurulması çərçivəsində yolun çəkilməsi üzrə layihələşdirmə işləri başa çatacaq. Bu barədə çərşənbə günü Trend-ə Nəqliyyat Nazirliyi "Azəryolservis" ASC-dəki mənbə deyib.
Onun sözlərinə görə, layihənin hazırlanması üzrə işlər artıq başlayıb və bu işlər başa çatdıqdan sonra şirkətin müəyyənləşdirilməsi üçün tender elan ediləcək. Şirkət yolun çəkilməsi üzrə işləri görəcək.
"İşlərin başlanması müddəti barədə layihələşdirmə prosesi başa çatdıqdan sonra danışmaq olar", - mənbə qeyd edib.
Mənbənin sözlərinə görə, yendiənqurma işləri çərçivəsində artıq iki yolayrıcının tikintisi və dəmiryol üzərindəki mövcud keçidin yenidən qurulması üzrə işlər başlanıb.
Xüsusilə, yolayrıcılardan biri üç tuneldən və bir yolötürücüdən ibarət olacaq, daha biri bir yolötürücüdən, qalan iki yolayrıcı isə tunel tipli olacaq.
Bundan əvvəl "Azəryolservis" ASC-nin rəhbəri Cavid Qurbanovun dediyinə görə, Ziya Bünyadov prospektinin yenidən qurulması üzrə işlərin 2012-ci ilin sonu-2013-cü ilin ortalarında başa çatdırmaq planlaşdırılır.
Yenidənqurma çərçivəsində prospektin genişləndirilməsi planlaşdırılır. Bu isə öz növbəsində adıçəkilən ərazidə yerləşən bəzi tikililərin sökülməsini tələb edəcək.