Azərbaycan, Bakı, 5 sentyabr /Trend, müxbir E.İsmayılov/
Bakı Metropoliteni yeni stansiyanın tikintisinə başlayıb. Həmin stansiya Həzi Aslanov stansiyasının yerləşdiyi xətdən Günəşli qəsəbəsi istiqamətində olan xəttə keçid stansiyası funksiyasını yerinə yetirəcək. Bu barədə Trend-ə bazar ertəsi metropolitendən bildirilib.
Onun sözlərinə görə, yeni stansiyanın yerləşdiyi ərazidə yer işləri və kommunikasiyaların daşınması tədbirləri artıq başlanıb.
"Həmin stansiyanı 2015-ci ildən sonra istifadəyə vermək planlaşdırılır", - mənbə bildirib.
Bu işlər Bakı Metropoliteninin 20 illik inkişaf proqramı çərçivəsində aparılır. Həmin uzunmüddətli inkişaf sxeminə əsasən, gələcəkdə Bakı Metropoliteninin ümumi şəbəkəsi 5 xətdən - hazırkı 2 xət və yeni 3 xətt - və uzunluğu 119 km olan metro xəttində yerləşən 76 stansiyadan ibarət olacaq. Yəni proqram 53 yeni stansiya və 84,3 km metro yolunun tikilməsini nəzərdə tutur.
Bakı Metropoliteni 1967-ci ildən fəaliyyət göstərir və hazırda 23 stansiyası var.